ما گۆں دَرداں مُساپِر جَلاں بیتَگێں
شَپ تَہار اَت پہ اوستے بَلاں بیتَگێں
نَوبَت ءِ دِل گُش ئے تیرے ءَ سُپتَگَت
تێوَگێں اَہد اَندۆہاں ماں رُپتَگَت
سُہب ءِ زێبائیں بَیرَک کہ سَرجَہل اِت اَنت
بے نَگێں بے گَہ ءِ رَکّ ھَم تَہل اِت اَنت
گْوات ءَ پێتکَگ زِرے مَچکَدَگ رُپتَگ اَنت
مُرگاں بَسّ مۆسُمانی گِلَگ رُپتَگ اَنت
دَور نَدات تُنّ وَتی ھِچّ شَند ءِ سَر ءَ
گۆش ءَ شێزارِتَگ آپبَند ئے سَر ءَ
زِندَگی چۆ کہ تَوک ءَ نَکُت ما گْوَر ءَ
رۆچ چَہ ھۆن ءِ دَریا ءَ کَشّیت سَر ءَ
سیِتَگ وَہد اِمرۆز ءِ دِل نێم بیت
ماہ جۆنانی کۆہ ءَ چَہ اَندێم بیت
زِندَگی ءِ اَبێتکێں نِگاہاں مَچار
کَسّ نَیَیت اِنت اِے وَیرانێں راہاں مَچار
نۆکێں چاڈے ءُ کَیپے مَلارے بِبیت
گُلزِمین ءَ گۆں کَول ءُ کَرارے بِبیت
زِند ءِ بانۆر ءِ زَہیراں مِرَگ لازُم اِنت
سَنگَتاں ھ ئے کَنِت سَر گِرَگ لازُم اِنت
گۆں تَئی زێبائی ئے تْرانَگاں سَر گِرێں
ئے وَتَن رۆچے پہ تَو ما سَد بَر مِرێں
<سترُنگ><اِم>مُنیر مۆمِن