تَہنائیں کُونجے زَہیر تَئی
اِے آزمان ءِ شیشَگێں تَمبُو ءِ چێرا سَوت جَنت
دانکے اِے دُنیا آگَہ اِنت داں باز دێراں سَوت جَنت
سَوتانی ھیر ءُ پۆپَلاں
گِنداں چۆ پُلّ ءَ سْرَپتَگ اَنت
کِشکانی دِلبَند ءِ سَر ءَ
کاڈی مَلارێں دیدگاں
تَہنائیں کُونجے زَہیر تَئی
مۆنجے وَتی سُنٹ ءَ رَجیت، دَردے پَتا ایت بانزُلاں
مَیمانی آزمان ءِ سَر ءَ بال اِنت چۆ اَرشی دُلدُلاں
ھَستی ءِ گْیابان ءِ دِل ءَ
چۆ کہ چِراگ ءَ رۆک بیت
ھَر تُستَگێں دِل بۆد کَنت
ھَر چَمّ کْوَہنێں نۆک بیت
تَہنائیں کُونجے زَہیر تَئی
کئێت زاپِرانێں دیگَر ءِ اَرسانی آس ءِ نۆشَگ ءَ
یَکّ آشِکی اِکرارے ءِ جیگبَند ءِ تُنّ ءِ پْرۆشَگ ءَ
وَہم ءُ گُماناں نَمب جَنت
سَہت ءُ دَماناں نَمب جَنت
ھۆشام ءَ بَکشیت زِندَگی
شار ءُ گُشاناں نَمب جَنت
تَہنائیں کُونجے زَہیر تَئی
<سترُنگ><اِم>مُنیر مۆمِن