نوں دِل گُشیت
سُہبا بِمَنّ ناں بے گَہ ءَ
بام ءَ بِزاں ناں رۆلَہ ءَ
چے دْرین، چے اِستین، چے مِسکێں سَمین
چے گُلزِمین!
دِل چۆ پَکیری تَہمبُل ءَ
ماریت ءُ سَگّیت ھَکَّل ءَ
واہَگ چۆ بے وانکێں مُساپِر ماں جَل ءَ
بے مِنزِل ءَ
ھَست اِنت شَپے، (ما اِشکُتَگ)
رۆچے بَلیت (اَنچۆ گُش اَنت)
کئے زانت رۆچ ءَ ، کئے شَپ ءَ
ھَردُک ھُدامَرزیگ
………۔بَستَگ شادَہ ئے سیگ ءِ سَریگ
مِہر ءِ ھَتَم آبادیے
اوست ءِ کُشَگ، اَہد ءِ پْرُشَگ، پہ آکِبَت ءَ پَدَّرێں گَمبادیے
یَکّ کَہر ءُ مِہر ءِ چِلَّہگرَنچێں سْیادیے
وابانی آدێنک ءَ زَمانَگ نْیادیے
اِے نْیادی ءَ
تامۆر بَنت سَرچَمَّگ ءِ شیراپێں زێمِل
سَبزَگێں تَلّ ءُ سَدَپدرَنزێں کِشارانی دَمال
چَمّ کۆر بَنت ءُ گۆش کَرّ
"چَہمیت 'مَتاہ' شَہمیت" زَرّ
چے دْرین، چے اِستین، چے مِسکێں سَمین
چے گُلزِمین!
اِے نْیادی ءَ
تَو ھَم بَہا
مَن ھَم بَہا
دِل چۆ پَکیری تَہمبُل ءَ
ماریت ءُ سَگّیت ھَکَّل ءَ
واہَگ چۆ بے وانکێں مُساپِر ماں جَل ءَ
بے مِنزِل ءَ
<سترُنگ><اِم>اَتا شاد