ناگُمانی چِست بَنت، دَر کاینت اُپّارَگ مَنی
مَن دَپ ءَ داراں، نَبیت دِل لَہڈجَنێں دارَگ مَنی
تَئی گَماں گار آں، مَنی رَنگ تَرِّتَگ زَرد ءُ زَلُور
گراں کَپتَگ دُژمِن ءُ دِلواہاں پَجّارَگ مَنی
ھِچّ تَرا باوَر نَکَنت، پہ مَن تُشے بَزَّگ نَبیت
دُژمِناں جَورێناں اوشتارێنَگ اِنت نارَگ مَنی
چاردَہ اَلّاہیگێں شَپ تَئی ھاتِر ءَ سُہبُن کُتَگ
دێمتِرا گۆں مَن نَبیت ھِچّ رَنگ ءَ دِل دارَگ مَنی
چَمّ پہ مِہر اَرساں رێچ اَنت، لَہڈ جَنت دِل پہ زَہیر
دۆست سَہڈێن اَنت مَن ءَ ءُ مَن کُداں بارَگ مَنی
چَہ وَت ءَ ھِچّی نَساراں نی مَن ءُ بَہریگ مَنی
باوَری گَپّے نَہ اِنت اِے گْرِمپُک ءَ شارَگ مَنی
پہ گِدارے گُڈّ چَہ مَن کَسّے بِگِند ئے پہ وَت ءَ
بایَد اِنت مَرگ ءَ چَہ پێسَر یَکّ بَرے چارَگ مَنی
ساہ مَنی دَر نَیَیت ھانُل تاں نَگِنداں مَن تَرا
دُرّێں نام ءَ تَئی گِراں بیت شَہادَت ئے آرَگ مَنی
<سترُنگ><اِم>سَیَد ھاشُمی
<اِم>شَپ ءِ اَدار 10، چارشَمبِہ، 19 دَسَمبَر 1950