<اَ>“اگں ماہ کَمّ نَزّیکتِرا بْیَیت گُڈا چے بیت؟”
مَیسِج ئے وانَگ ءَ رَند مَن پَسَّو دات کہ دَریا ءِ گْوَرم کَمّ مَستِر بَنت ءُ بیلّ ئے آپ جُڈّی ءِ راہ ءَ بَند کَنت۔
آئی ءَ کَندَگ وال ءَ جِنُّکے دێم دات، مَن ھِچّ نَگُشت۔ مَن زانت چیزّے دێم بِدَیاں، جَواب ءَ پَدا چیزّے کئێت ءُ جِنِکّ گۆں مَیسِجاں مَن ءَ وانَگ ءَ نَیلیت۔
اَسَل ءَ مَن نَزانت کہ اِے جِنِکّ کئے اِنت ءُ پَرچا مَن ءَ مَیسِج کَنت۔ مَن اِے زانَگ ءِ جُہد ھَم نَکُت ءُ آئی ءَ ھَم وَتی پَجّار بِہ زاہِر نَکُت۔ آئی ءَ گێشتِر ماہ ءِ بابَت ءَ جُست کُت، گُش ئے ماہ ئِے سَکّ دۆست بُوت پَمِشکا مَن آئی ءِ نام ھَم وَتی مُباِل ءَ "ماہ" نِبِشتَہ کُتَگَت۔
یَکّ رَندے ھَمے ماہ ءَ مَن ءَ مَیسِج کُت:
"تَرا ماہ دۆست بیت؟
مَن گُشت، "اِنّاں۔"
گُشیت چی ءَ ؟
مَن گُشت، "ماہ ءَ بایَد اِنت زِمین ءِ بَدَل ءَ رۆچ ءِ تَوواب بُکُتێں۔"
پَدا گُشت ئِے، "چی ءَ زاناں؟"
یَکّ بَرے مَن گُشت کہ گُشان ئِے رۆچ ءِ رُژنائی ءَ زُوریت بلے پَدا مَن ھِچّ نَگُشت کہ اِے گَپّ ءَ کَپیت کَلاکانی کَلاک گَپّ کَنت پَمِشکا مَرچی مَن اِشی ئے مَیسِجانی باز جَواب نَدات کہ مَن ءَ وَتی کِتاب ءِ کار دَست ءَ اَت اَنت۔ مَنی کِتاب اِستالانی بابَت ءَ پَٹّ ءُ پۆلے اَت ءُ اِے جِنِکّ ءَ مُدام ماہ ءِ بابَت ءَ گَپّ جَتَگَت۔ ماہ یَکّے اَت ءُ اِستال باز اَت اَنت۔
مَن چینچو مێتَگ ءَ سَپَر کُت، چینچو مۆسُمزانت ءُ ناہُدایاں گۆں گِند ءُ نِند کُت بلے کِتاب ءِ کار اَنگَت باز پَشت کَپتَگَت۔ مَن ھَر مێتَگ ءَ کہ شُتاں نِٹوَرک ئے رَسَگ ءِ شَرت ءَ آئی ءِ مَیسِج اَتک، "ماہ ءِ سَر ءَ بَلُّک ءُ گْوانزَگ ءِ کِسَّہ ءِ پُژدَر چی اِنت؟ زِمین ءِ ماہ اگں باز بُوتێن اَنت چۆن شَوک بُوتێں۔"
یَکّ رۆچے مَن گُشت، "مَن وَتی کِتاب ءِ کاراں دَزگَٹّ آں، تَئی مَیسِج جَواب نَبَنت۔
گُشیت، "وَتی کِتاب ءِ نام ءَ بِکَن اِستال شَپادا گَرد اَنت۔"
مَن گُشت، "اِے وَ مُنیر مۆمِن ءِ کِتاب ءِ نام اِنت۔
گُشیت، "گُڈا ‘تار ءِ زَمین پَر’ بِکَن ئِے۔"
پَدا کَندَگ وال ءَ جِنُّکے دێم ئِے دات۔
ھما شَپی ھَم مَن نِشتَگ ءُ وَتی کِتاب ءِ کاراں دَزگَٹّ اَتاں کہ مَیسِج اَتک، "ماہ ءَ پَرچا دۆست نَدار ئے؟"
مَن ھِچّ نَگُشت، مُباِل ھامۆش کُت ءُ اێر کُت۔ مَن ءَ بازێں کارے دێم ءَ اَت۔ چینکَس اِستال گۆن اَت، تیربَند، سَمّاک، شَپکَشّ، پَور، سُہَیل، بام، زال، گاہ، ناش۔ پَدا چینچو ناش اَت اَنت، یَکّ ءُ دُا بِگِر داں ھَپت ءُ ھَشت ناش ءَ ۔ مَن گۆں اِستالاں دُچار اَتاں۔ شَپ پُلان اَت۔ یَکّ بَج ءَ مَنی سِگرێٹ ھَم ھَلاس بُوت اَنت ءُ کار ھَم ٹُکُّرے بُوت۔ تَچک بَیَگ ءَ رَند مَن دِل ءَ جێڈِت، نوں کَمپۆزِنگ ئے کار بِندات کَنَگی اِنت۔ سَرتاک ءِ واست ءَ ھَم مَردُمے چارَگی اِنت۔ پَدا پُرُوپ ھَم لۆٹیت۔ اَنگا باز کار ھَست۔ ھَمے ساہَت ءَ مَیسِجے اَتک، "اَگاں ماہ ءُ اِستال ھۆر بِبَنت چے بیت؟"
<سترُنگ><اِم>اِرپاں اَسلَم