مَنَ زَمانَگے ءَ رَزا جَہانگیر ءَ جُست کُت کہ راجی جُنز چۆن دێم ءَ شُت کَنت۔
مَن پَسَّو دات: ھَرکَس جُنز ءَ وَتی بِکَنت، چۆکہ مَنی مات، مَنی پِت، مَنی بْرات، ھَمے رَنگ ءَ مَنی جُنز۔
رَزا ءَ مَن ءَ جُست کُت کہ اِے رَنگ ءَ جُنز مَہدُود نَبیت؟
مَن ءَ یاد اِنت مَن پَسَّو دات کہ اِنّاں۔ پَرسنَل (پِرسُنَل) بیت۔ مَردُمے ءِ مِرَگ ءَ آئی ءِ ھانداں ھَلاس نَبیت۔ آئی ءِ بْرات، گُہار، چُکّ، نُماسَگ، سْیاد، سانگبَند، سَنگَت، دْراہ دێم ءَ رَواں کَن اَنت۔ جُنز ھَمے رَنگ ءَ دێم ءَ رَواں کَنت
رَزا ءَ مَن ءَ جُست کُتَگَت: پہ مَردُمے ءَ جُنز کَدی ھَلاس بیت؟
مَن پَسَّو داتَگَت: ھما وَہد ءَ کہ آ مِریت۔
تَو کہ مُرت ئے بِزاں پہ تَرا جُنز ھَلاس؟
مَن گُشت ھَو۔
بِزاں مَردُمے ءِ مِرَگ ءَ جُنز نَمِریت؟ رَزا ءَ بِچکَندِت ءُ جُست کُت۔
مَن ھَم بِچکَندِت۔
رَزا مَنی چارَگ ءَ بَلۆچِستاں اَکَیڈَمی تُربَت ءَ اَتکَگَت۔ ما دێراں نِشت، گَپّ جَت ءُ پَدا آئی ءَ گۆں مَن اَکسے کَشِّت ءُ شُت۔
مَرچی کہ رَزا ءِ جِند شُتَگ ءُ وَتی جُنز ءِ بَہر ئِے پہ مَردُماں اێر کُتَگ ءُ دێم ءَ جُنزِتَگ، مَن رَزا ءَ گَپّ ھال دَیَگ لۆٹاں، مَن آئی ءَ گُشَگ لۆٹاں، رَزا! اِے راستے مَردُم ءِ مِرَگ ءَ رَند جُنز نَمِریت۔ ءُ بلے رَزا! مَردُم ھَم نَمِریت۔
ھَمے دَمان ءَ یَکّے ءَ دَروازَگ ٹُکِّت ءُ مَن کَلَم اێر کُت۔
دَروازَگ پَچ کُت۔ چارِت کَسّ نێست اَت۔
<سترُنگ><اِم>ھَنیپ شَریپ