لِوار بیت یا بَہار ءُ جَمبَر، رَواں کَنت شَپ، رَواں کَناں مَن
تَئی یات کاینت مَن ءَ را دِلبَر، رَواں کَنت شَپ، رَواں کَناں مَن
نئے اَتک ھَیالے، نئے اَتک زَہیرے، نہ تْرانَگے نہ مَلار ءُ گیرے
ھَمێش اِنت تَہنایانی آسَر، رَواں کَنت شَپ، رَواں کَناں مَن
اِے جَنگ کہ گۆں وَت ءَ بِنا اِنت، اِے جَنگ داں کْیامَتا نَکُٹّیت
مَرۆچیا گِر داں رۆزِ مَہشَر، رَواں کَنت شَپ، رَواں کَناں مَن
ھما مُرادانی آبرێچاں کہ دَرد ءِ مۆسُم کَدی نَہَلّ اَنت
مَن ءَ ھما دَمک ءُ مێتَگاں بَر، رَواں کَنت شَپ، رَواں کَناں مَن
مۆبَرِکارا شَرابجاہ ءِ تَب ءَ ھَمینچ ھۆمَر کُرتَگ
گُشیت داں اَرش ءَ بِباں اَگاں سَر، رَواں کَنت شَپ، رَواں کَناں مَن
<سترُنگ><اِم>مُبارِک کازی