“وَتی تْرُو ءَ بِگِند۔”
مَنی ناکُو ءَ یَکّ زێبائیں جِنِکے ءِ نێمَگ ءَ وَتی دَست شَہار دات۔
“اِشیا؟” مَن ھَیرانیا جُست کُرت۔
“ھَو، ھَو۔ اِے تَئی تْرُو دُرگُل اِنت۔”
دُرگُل ءِ نام ءِ اِشکُنَگ ءَ مَنی دێم ءَ دَہ سال ءِ یاتانی وَشّێں نِدارَگ گَردَگ ءَ لَگِّت اَنت۔ آئی ءِ زێبائی، سِکَّہ، رَنگ ءُ دانَگ، آسکی دیدَگ، کاٹارێں پۆنز، کَمانێں بُرواں، مارپێچێں مَلگۆر ھَر وَرنائیں دِل ءَ چَہ بَندۆکاں سِندیت۔ بلے مَن ءَ آئی ءِ پُلّێں دێم ءِ سُہرێں لُنٹانی وَشّێں بِچکَندَگ سَکّ دۆست اَنت۔ پَمێشا مَن ناکُو ءِ اِے گَپّ ءَ کہ تَئی تْرُو دُرگُل اِنت، باز ھَیراں مَنتاں پَرچا کہ آ چَہ کَسانی ءَ مَنی واب ءُ ھَیالانی مَہدَروَرێں دُتُّک اَت۔ بلے نوں کہ مَنی کَماشێں ناکُو ءَ وَتی لۆگبانُک کُرتَگَت، پہ مَن چَہ پِگر ءُ ھَیالاں اَبَید دِگِہ ھِچّ پَشت نَکَپتَگَت۔ پَمے سَوَب ءَ چَہ مَنی چَمّاں اَرسانی رَگام شَلِت اَنت ءُ چَہ دِل ءِ بُنبَند ءَ اُپّاراں باہَند کُت، بلے پہ ناکُو ءِ کۆہێں ھاتِر ءَ مَن وَتی بے تاہیری یَکدَم سَہرا نَکُت۔ بلے چۆنایا اِے گَمانی بار پہ مَنی نِزۆرێں بالاد ءُ سَگّ ءَ گێش اَت۔ پَمێشا مَن پہ ڈَنّ ءِ رَوَگ ءَ وَتی گامانا پہ گێگ ءُ اَندام چِست کُت، گْوَش ئے کہ دْراہێں زِمین ءِ بار مَنی چَکّ ءَ اَت۔
“اَسَّلام اَلَیکُم۔” مَن ناکُو ءَ را سَلام دات ءُ گُشاد گُشاد ءَ پہ وَتی بان ءَ دَر شُتاں۔
“والَیکُم سَلام۔ بُرَو، تَو ھُدا ءِ مَیار ئے۔”
مَن وَتی بان ءَ تَہت ءِ سَر ءَ شَکُوندێم بُوتان ءُ پِگر ءُ اَندۆہانی تُوپّانا مَن ءَ رُپت۔ مَن ھَیال کُرت کہ مئے رَواجاں چینکَس بے ڈَول ءُ بَدرَنگێں کاراں وَتی دامُن ءَ را پۆلِنگ کُرتَگ۔ مَنی ڈَولێں چینکَس وَرنا پہ وَتی ھَکّێں اَرمان ءُ واہَگاں تَلوَسَگ ءَ اِنت، بلے آ زالِمێں رَواج ءِ دێم ءَ بے وَس اَنت۔ مَن ءَ ھَشتاد سالیێں ناکُو ءِ گۆں کَسانسالێں دُرگُل ءَ سُور کَنَگ سَکّ تَورِت بلے چۆن کَناں؟ کَماشانا پَنت ءُ سۆج کَنَگ مَزَنێں بے اَدَبیے۔ پَمے سَوَب ءَ پہ مَن ناُمێتی ئے آہ ءُ اُپّاراں اَبَید دِگِہ ھِچّ پَد نَمَنت ءُ مَن چَہ پَہکێں لاچاریا گۆں ھُدا ءَ جُست ءُ جَواب کُرت۔
“اُو واجَہ ھُدا! مَنی گُناہ ءُ مَیار چی اِنت؟ چۆش پَرچا بُوت؟ تَئی ھَم واہَگ ھَمِش اَت کہ دُرگُل یَکّے ءِ اَنامَت اَت، آ دِگِہ کَسے ءِ لۆگ ءِ زێب ءُ بْراہ بِبیت؟ اِے یَکّ وابے وَ نَہ اِنت؟ بلے نہ۔ اِے واب یَکّ اَلَّمێں اِہوالے ءِ بُوت۔ مَنی دیدَگانی اَرس ناہُودَگ ءَ رِتک اَنت۔ مَنی دُنیا وَیراں… ءُ مَنی ناکُو ءِ دُنیا آباد بُوت۔”
دُنیا ءِ چارێں کُنڈاں تَباہی ءَ ماں شانتَگَت۔ ھَمے تَہارماہێں شَپ ءَ آزمان ءِ اِستار دْرَپشَگ ءَ اَت اَنت، بلے مَنی تَہارێں شَپ ءِ ھما دْرَپشۆکێں اِستال کہ باز دێراں رَند ڈَلَگ بُوتَگَت نوں مِرمِرانکُو بُوت… ءُ مَنی اُمێتانی دُنیا ھَر نێمَگ ءَ سْیاہ ءُ تَہار اَت، نہ راہے پَد، نہ دێم۔ چَہ وَتی دِل ءِ ھَلاہۆش ءَ زْیارَت ءُ پیران ءَ تَوارُن پِر کُت… وَتی گْرانێں گَمانی سُبَکتِر کَنَگ ءَ دێم پہ مَسیت ءَ شُتان ءُ گۆں ھُدا ءَ وا ءُ زاریُن کُرت۔
“واجَہ ھُدا! بارێں چۆش بُوت؟ اَچ مَرۆچیا دَہ سال ءَ پێش مَن ءُ دُرگُل ءَ تَئی پاکێں لۆگ (مَسیت)آ زِند ءِ سَکّی ءُ سۆریانی تَہا ھَمراہ ءُ ھَمکۆپَگ بَیَگ ءِ سَوگِند وارت بلے مَرۆچی، دَہ سال ءَ پَد مَن چے گِندَگ ءَ آں؟ کہ مَنی زِندَگانی ءِ رُژنائیں ماہ دِگِرے ءِ لۆگ ءَ شَہم کَنَگ ءَ اِنت۔ رَستے کہ دُنیا سَکّ بے رَہم اِنت بلے تَو زانا بے رَہم نا ئِے؟ تَوبَہ، تَو ھَم کَسّ ءَ را ھِچّ گُشت نَکُرت کہ دُرگُل یَکّے ءِ اَنامَت اِنت؟”
یَکّ رۆچے مَن وَتی یَکّ سَنگَتے ءِ دُچار کَپَگ ءَ رَوَگ ءَ اَتاں کہ مَن دُرگُل دُمی نێمَگ ءَ آیَگ ءَ دیست۔ مَن اوشتاتاں بلے آ گۆں وَتی دَزگُہاراں گَپّ جَناں چَہ مَن شِگوَست ءُ مَن ھُشک ءُ ھَیراں بُوتاں کہ آ پَرچا چۆش مَواز اِنت۔
رۆچ شَپ ءُ شَپ رۆچ بَیان ءَ گْوَست اَنت ءُ مَن مُلُور مُلُور بُوتان ءُ ھَر وَہد ءَ پِگر جَت کہ دُرگُل مَنی گْوَر ءَ پَرچا چۆ بے بْرَمش ءُ تَوار ءَ گْوَزیت، گْوَش ئے کہ مَن ءَ پَجّاہ نَیاریت۔ مَن وَتی دِل ءَ نییَت کُرت کہ مَن دُرگُل ءَ آ رۆچ ءِ مُوازی ئے سَوَب ءَ زَلُور جُست کَناں۔ پَمێشا مَن پہ آئی ءِ لۆگ ءَ رَہادَگ بُوتاں۔ بلے وَہدے کہ دَروازَگ ءَ سَر کَشِّت تَ دیستُن کہ آ دْراجێں آدێنک ءِ دێم ءَ نِشتَگ، وَتی مُود ءُ مَلگۆراں رَندَگ ءُ وَتی جِند ءِ سَمبَہێنَگ ءَ اَت کہ یَکّ رۆدَراتکی جَنێںے ءَ چۆش نَبراہیت، ءُ چَہ آئی ءِ اِے ھالَت ءَ مَن سَکّ پَدَرد بُوتاں۔ مَن آئی ءِ بان ءِ تَہا پُتِرتان ءُ دَروازَگ بَند کُت۔ مَن سَکّ بے تاہیر اَتاں۔ بلے آئی ءَ گۆں مَزَنێں پَہرے ءَ دَرّاێنت: “بُگُش، چِہ گَپّے؟”
“مَن… مَن…”
“ھَو جی… جی… بُگُش تَو چی ءَ تُرس ئے؟”
“مَن… مَن… تَو نَوَشّ نَبَئے؟”
“اِنّاں… تَو بُگُش نہ۔”
“دُرگُل…”
“جی…”
“دُرگُل! ما زِندَگانی ءَ یَکّ دُمی ئے ھَمراہ ءُ ھَمکۆپَگ بَیَگ ءِ سَوگِند وارتَگَت بلے مَنی رَوَگ ءَ رَند پَرچا چۆش بُوت؟ مَن وَتی دِل ءَ چینکَس واہِش ءُ اَرماں داشتَگ، پہ لۆگ ءَ اَتکَگَتاں بلے مَنی دُرسێں واہِش ءُ اَرماں گۆں ھاک ءُ پُراں ھَوار بُوت اَنت۔ مَرۆچی مَن تَرا ھَمے جُست ءَ کَناں کہ اِے دُرس چَہ تَئی واہَگ ءَ بُوتَگ اَنت، اگں نہ؟”
“ھَو… چَہ مَنی واہَگ ءَ۔” آئی ءَ وَتی چَمّان ءَ جَہل کُت اَنت ءُ یَکّ نِزۆرێں تَوارے ءَ پَسَّو دات۔
“تَو گُڈا ھما سَوگِندانا زُوتّ شَمۆشت کہ ما پاکێں مَسیت ءَ وارت اَنت؟”
“اِنّا… بلے…”
“بلے… چے؟”
“بلے نوں زَمانَگ باز دێم ءَ شُتَگ ءُ اِے دێم ءَ رَۆکێں زَمانَگ ءِ واست ءَ مال لۆٹیت…”
“…سُہر ءُ زَرّ لۆٹیت۔” مَن آئی ءِ گَپّ ءَ را تَوام کُت۔
“تَو نَزان ئے، کَریم! مَن ءَ گۆں تَئی ناکُو ءَ ھِچّ واہَگ نێست۔ بلے مَن گۆں آئی ءِ مال ءُ دَولَت ءَ ھُبّ داران ءُ تَئی ناکُو مَرچی نہ باندات اِنت چَرے دُنیا ءَ رَوت۔ دِگِہ پَرچا چَہ آئی ءِ دَولَت ءَ پاِدَگ بِکَشّ اَنت۔”
“بَسّ کَن وَتی پُوتّاریا۔ مَن تَئی ڈَولێں مَکربازێں جَنێن ءَ زِندَگ ءَ پَشت نَگێجاں۔ اَنُّون تَئی ھما ھال بیت، اَنچۆ کہ یَکّ مَزَنێں گُنَہکارے ءِ، تکہاں تَو چَہ وَتی لُچّێں واہَگ ءَ دِگِہ کَسّ ءَ بَرباد مَکَن ئے۔”
مَن یَکدَم دُرگُل گُٹگیر کُرت اَنچۆ کہ یَکّ شاہینے جِنجِشک ءِ سَر ءَ ھیژ بِکَنت بلے مَنی دَست لَرزِت اَنت ءُ یَکّ تَوارے مَنی گۆشاں کَپت۔
“پَرچا وَتی ناکُو ءِ اَرمان ءُ واہَگانی دُنیا ءَ وَیراں کن ئے؟ ھما ناکُو کہ تَرا ھَرچ ءُ دَرچ ئِے دات… وانێنت ئِے… تَئی ھَر ٹَہل ءُ ناز ئِے پُجِّت۔ بلے مَرۆچی تَو آئی ءِ واہَگانی دُنیا ءَ تَباہ کَنَگ ءَ ئے۔”
مَن شُت ءُ مَسیت ءَ تَگِرد ءِ سَر ءَ دێم پہ چێر کَپتاں۔ بے گاہ، شَپ ءُ شَپ، نێمشَپ بُوت۔ ساہَت دْراج بُوت ءُ وَہد وَتی جاہ ءَ جِکّ اوشتات۔ مَنی اَرس ءِ گَوہَر زِمین ءِ ماتی دامُن ءَ کَپت اَنت۔ مَن پاد اَتک ءُ ڈَنّ ءَ دَر اَتکاں۔ مَن دِل پُرّ اَت۔ گَم، وَپا، دۆستی، بے وَپائی، زِند، دُرگُل، ناکُو، دَرد، دِل، رَنج، زَہربار، دۆست، نادۆستی، بے وَپا، دُنیا، مال، زَرّ، دۆستی، دُرگُل، بے وَپا، مَرک، زِند، کُلّ آہت ءُ مَنی دێم ءَ اوشتی اَت اَنت۔
کُج ءَ …؟ کُج ءَ …؟ مَن اَچ وَتی دِل ءَ پُرسِت۔ مَنی سَر جَہل اَت ءُ گۆں وَتی گَماں جێڈَگ ءَ اَتاں۔ زِند چےے؟ وَپا چے اِنت؟ دۆستی کُجامی ءِ نام اِنت؟ مَنی راہ کُجام اِنت؟
دِل ءَ پَدا دَردے پاد آہت۔
اِے کارچ اِنت۔ ناکُو واب اِنت، وَتی وَرنائیں جن ئے بَگَل ءَ اِنت۔ مَنی چَمّاں دیست کہ دُرگُل ناکُو ءِ بَگَل ءَ اِنت۔ آئی ءِ بادامێں چَمّ بَند اَنت ءُ لُنٹ ئِے پَچ اَنت۔ مَنی دِل اَچ زَہر ءَ پُرّ بُوت، ھۆن ماں رَگاں تێز بُوت، لُنٹ گَٹّ چِت اَنت، دَست پہ لانک ءِ کارچ ءَ شُت، گام تێز کُرت اَنت ءُ پہ ناکُو ءِ لۆگ ءَ رَہادَگ بُوتاں۔
اَناگَہا کُچِکّے ءَ وَکِّت ءُ مَن اَچ وَتی واب ءَ آگَہ بُوتاں۔ مَن وَتی چَمّان ءَ چِست کُت، بُرز ءَ چارِت۔ زِمِستانی شَپ ءِ بیستی ماہ اێر رَوَگی اَت ءُ چۆ سالی نادراہ ءَ مَنی نێمَگ ءَ گِندَگ ءَ اَت۔ زِمین ءُ آزماں ماہ ءِ نُور ءِ چادِر ءَ واب اَت اَنت۔ آزماں ساپ اَت ءُ اِستار جَڈَشکَگ ءَ اَت اَنت۔ دْرَچکانی کَپتَگێں تاک مَنی پادانی چێرا چۆ پْرُشتَگێں دِل ءَ تَوار ءَ اَت اَنت۔ مَن وَتی چَمّ ماہ ءَ سَکّ دات اَنت ءُ اوشتاتاں۔ ماہ ءِ نُور ءَ مَنی دِل اَچ نُور ءَ پُرّ کُرت۔ اُپّ، اُپّ، زِند۔ دِل ءِ تَہاری ءِ تَہا گِرۆکے ءَ جَت۔ دۆستی ءِ یَکّ لَہڈے پاد اَہت۔ اِے رُژنائیں زَردرَنگێں ماہ، اِے کَپتَگێں تاک، اِے مُرتَگێں پُلّاں مَنی دَرد، مَنی زَہر، مَنی گَم بَہر کُت اَنت۔ مَنی چَمّاں اَرس آہت اَنت، دِل چۆ آزمان ءَ پْراہ بُوت، اِستار دِل ءَ رۆک بُوت اَنت۔
اِے ٹُوہێں پْراہێں گُلزِمین ءَ بے وَپائیں دُرگُل ءَ جاگَہ ھَست۔ اِے زِند پہ ناکُو ءَ ھَم وَشّ اِنت۔ اِے ماہ ءُ اِستالی دُنیا، اِے سَبزێں زِر، پُلّانی دُنیا ناکُو ءُ دُرگُل ءَ نَسیب بات۔
مَن اَچ وَتی ناکُو ءِ لۆگ ءِ راہ ءَ پَدا گَشت ءُ دِگِہ راہے گِپت۔ مَنی گام تێز بُوت اَنت۔ مَنی زُبان ءَ وَشّ وَشّا اِے لَبز دَر اَتک اَنت: “ناکُو! دُرگُل! مَن ءَ پَہِلّ کَنِت!!!”
<سترُنگ><اِم>نَسیم دَشتی