تَو سَر گِر ئے یا جَلّ ءِ اِے جَہاں بَسّ ھَمے مَنی
اِے زِندَگی اِنت پہ مِرَگ نیشاں بَسّ ھَمے مَنی
اِے واہَگانی جَنگَل ءَ کُج ءَ کُج ءَ ما شُت نَبێں
مئے تَب بِبیت تَ ھۆری ءَ چِہ کار یار کُت نَبێں
اِے شَپ گْوَزیت ءُ سُہب بیت اِے زِندَگی وَپا نَکَنت
اِے وَشنَیَتکێں نَوبَتانی واب چَمّاں راہ نَکَنت
بِرێں مِرێں پہ واہَگاں……۔ پہ واہَگاں
مَن ھَور مَنتَگاں چۆ ھُشک ءُ کَلَّرێں دَیارے ءَ
مَن کُہسَراں زَہیرے آں چۆ پُلّێں سَرمَچارے ءَ
چۆ واب دیدَگێں دِلے ھَزانَگ ءَ چَہ دَر بْیَیت
نَزانَگانی مُزّ گۆں تَئی زانَگ ءَ چَہ دَر بْیَیت
رَواں زِندماں اِے کہ پہ کَسّ ءَ نَۆشتَگی
گێچێنَگی اِنت مارا راہ چۆ بے وَسا نَۆشتَگی
بِرێں مِرێں پہ واہَگاں……۔ پہ واہَگاں
کَمالێں بے اَزابا کَسّ مَرَوت ءُ جاہے سَر بِبیت
اِے اُمر ءِ نێم تَئی کہ بیت بُرَوت ءُ بے سَپَر بِبیت
اِے لَیبجاہ ءَ لَیب ھَست زَہیر ھَست ءُ تیر ھَست
اِے دَمکاں بے کَراری ئے مَبیتێں ھِچّ پَکیر ھَست
ما بے ھِساب ءَ آدَم ءُ ھَوا ءَ چۆ ھِساب بے ن
اِے وَہد ءَ ھَرکَس اِنت کَلَم ما چۆ پَچێں کِتاب بے ن
بِرێں مِرێں پہ واہَگاں…۔۔ پہ واہَگاں
زُباں گۆں ما گۆں بِبیت ءُ دۆد مئے وَتی بِبَنت
اِے کَور مئے، اِے گَزّ مئے، کَرۆد مئے وَتی بِبَنت
ما بُکّ وَران ءُ سَر جَناں زِر ءِ داں نێم ءَ رَستَگێں
چۆ دَرد ءُ ٹَپّ نَبُوتَگێں اَجَب کہ زَہم ءَ رَستَگێں
جَہان ءِ جَہل ءُ بُرزیاں بے ن زێر ءُ ما زَبَر گِرێں
چَہ پێش دَر کہ بَند بَنت دَریچَہاں چَہ سَر گِرێں
بِرێں مِرێں پہ واہَگاں…۔۔ پہ واہَگاں
کئے ءَ گۆں جاک ءُ جَنگ بے ن کئے ءَ مَلام پِر کَنێں
چَہ دَر کَپێں زَمانَگ ءَ مَن ءُ کہ تَو سَپَر کَنێں
اِے دِلنَسَگّێں دیریانی سَرمَتابێں چَنڈَگاں
وَپا ءِ کِشک ءَ کُنٹَگێں اِے رَنج ءِ راہ ءُ کَنڈَگاں
زَہیریگانی ساہَتاں گۆں یَکّ دَمے دُچار بے ن
پَدا ماں سَبزێں ساہِگاں گُل ءَ چۆ بے کَرار بے ن
بِرێں مِرێں پہ واہَگاں…۔۔ پہ واہَگاں
<سترُنگ><اِم>آہُوگ گُل