مَن زُلم ءِ راہ ءَ آس، دِل ءَ آساپ کُتَگ
مَن آس کَماتَگ جُہد ءِ سِچکانێں کِسَّہ
مَن پُلّے کِشتَگ جُہد ءِ تَلکارێں لُنٹاں
مَن اَرسے وَنتَگ زُلمانی ژَندێں دَرساں
داں سیپارائیں جُہد ءِ دامُن دَرگاہے
مَن یاگی باں پہ آشۆب ءِ مِسکێں نام ءَ
داں زُلمانی رۆزَرد ءَ رۆچ سَہرا بیت
داں سانکَلبَندێں شَپ کہ بام ءَ سُجدَہ کَنت
داں پُلّاں رَنگ ءِ نۆکێں مِستَگے سَر بیت
داں کَوش ءَ مَجلِسبُوێں دُنیایے گۆں بیت
مَن زُلم ءِ دَست ءَ اَہد ءِ گْوات ءَ گار نَباں
مَن نۆکێں رۆچ ءِ نۆکێں جُہد ءِ کَندیل آں
مَن پَیوَست آں چَہ سَد سال ءَ رۆچ ءِ رَنگ ءَ
مَن آشۆب ءِ ھۆنانی دَریا ءِ چَولُن
مَن مِہر ءِ جَنگَل آس ءِ گۆں آپ ءَ شُشتَگ
مَن بالاچ ءِ نام ءَ رُژنے ماہ ءَ زُرتَگ
مَن گْوَہرام ءِ کَنجَر ھۆن ءِ جُتکاں شُشتَگ
مَن دۆدا، ھَمَّل، بیبَگر، اَہد ءِ پاسپان اَنت
مَن کَمبَر کَولے کِشتَگ زِرد ءِ تُہمکار ءَ
چۆ آریپێں اَگبَر، مێنگَل، ھَیر بَکش ءَ مَن
چۆ واہِد کَمبَر، ھالِد، بالاچ، بْراہُندَگ
مَن آزاتی ءِ “اِسمِ آزُم” دَر بُرتَگ
مَن زۆراک آں چۆ “یاسین ءَ ” اَرش ءِ زۆر ءَ
مَن پێداک آں چۆ وَہد ءِ رَگبارێں تیر ءَ
مَن وَتواجَہی رُژن ءُ رۆچ ءِ پاسپاں آں
مَن جُہد ءِ بَیرَکدارێں زِند ءِ پَرماں آں
مَن زُمزُم شۆراک اَرسێں مات ءِ اَرماں آں
<سترُنگ><اِم>رَپیک نَواب
25 پَروَری، 2008