گۆدی!
نَزاناں چی ءَ ھَمے کہ بَلۆچ ءِ آکِبَت ءِ رَکّێنَگ ءِ گَپّ کئێت گُڈا مَن ءَ شَہید کامرَیڈ کَییُوم جاں گیر کئێت کہ آئی ءَ گُشتَگَت:
“داں بَلۆچِستان ءِ پُسَّگ شَہیدانی چُکّ ءُ نُماسَگ مَب اَنت، بَلۆچِستاں آجُو نَبیت۔”
اِے لاگَر ءُ تَوانگرێں بامَرد ءِ گُشتَگێں ھَمے دانک رۆچ پہ رۆچ وَتی گْواہی ءَ دَیان اِنت۔
“سُچیت ھما دار کہ آس ءَ اِنت،
زِندَگێں دْرَچک ءَ چے سَما
کَوش بِبیت کہ زِربار ءِ ھَوا
شیکیت ھَمُک گْوات ءِ تَب ءَ ۔”
بَلۆچ راجی جُنز ءِ وَشبَہتی اِنت کہ اُستاد کامرَیڈ واہِد کَمبَر ءُ تَئی آریپێں واجَہ شَہید گَپّار لانگَو ءِ جُہدانی بَروَرد ءَ اَژنۆک بِنا بیتَگێں ماں بَلۆچ راجی جُنز ءَ لُمَّہ جان ءُ تَئی کِرد بَلۆچ ءِ دَپتَر ءَ نَگواہیت۔ بَلۆچ ءِ دِلێری ءُ جَنگ کَنَگ آئی ءِ سَرِشت ءَ مان اَنت۔ آ دِلێر زالبُولے بیت کہ نَرینَگے اِنّاں! اَلَّم اِے نۆکێں بَلۆچ زالبُول چَہ شُمئے لێکَہ ءُ دیدانک ءَ وَدی بیتَگێں زالبُول اَنت۔ زیکێں زالبُول ءَ زَہم زُرتَگ ءُ اَپس سَنج ءُ زێں کُتَگ پہ وَتی بْرات ءَ یَکّ تَہنا پاد اَتکَگ۔ اگں جَنگے ءَ گۆں بیتَگ پہ وَتی کَہۆل ءُ ٹَکّا، بلے ھَمے ٹَکّ ءُ بۆلَک ءُ کُٹُماں یَکّ راجے کَنَگ ءَ زالبُول ءَ کہ یَکّ مُچّانکی پِگرے دَیَگ ءُ آئی ءَ چَہ چُلّ ءُ لۆگ ءِ پێژگاہ ءَ کَشَّگ ءُ ڈَنّ ءَ آرَگ، آئی ءِ ھَمے ھَدّ ءَ ھێل دَیَگ ءُ بُودناک کَنَگ کہ آ چَہ زانت ءُ زانَگ ءَ سَرّێچێں وانۆک ءُ سِنچیێں زالبُولے جۆڈ بیت ءُ بَلۆچ راجی جُنز ءَ یَکّ مُہر ءُ مُہکَمێں جُنزے کَنَگ ءَ وَتی کِرد ءَ پیلَو کَنَگ ءَ اِنت۔ جَنگ بِبیت یا سْیاسَت، ھَرد تَکاں یَکّ اَنچێں کِردے پیلَو کَنَگ ءَ اِنت کہ آ بَلۆچ ءِ گْوَستانک ءَ اِے داب ءَ نێست اِنت۔
شُمئے جُہدانی بَروَرد اِنت کہ سَنجانی یَکّ اَنچێں ھارے بُتکَگ کہ آئی ءِ وَدی بَیَگ ءَ دَرد ءِ جَمبَر ءَ ھۆن دو دَستی گْوَرتَگ۔ اِے ھار کہ گۆں سۆرێں اَرسانی زِر ءَ ھَوار کَپان اَنت چِد ءُ مَستِر بَیان اَنت۔
نَزاناں شُمارا مُرادباتی بِدیاں یا گَمبارێں جَہاںے ءِ چۆ ھَستێں وَہد ءِ زۆراک ءَ پہ وَتی پَشت کَپَگ ءَ نیمّۆنے بِسازان ءُ “بَلۆچ یَکجَہتی کَمیٹی”ئے وَڈێں پاک ءُ پَلگارێں گَلے ءِ لۆٹ کہ بَلۆچ ءِ آکِبَت ءِ گَپّ ءَ کَنت آئی ءَ بْیاراں سَریگے ءِ بُش ءَ بِبَندان ءُ نَنگ ءُ نام ءِ نام زار بِجَناں۔
ما چِتَور ھَمے نَنگ ءُ نامُوس ءِ نام ءَ گِپت کَنَگ ءَ ایں؟ یَکّے شُمارا “بَیٹی” ءُ “بَچّی” گُشَگ ءَ اِنت دِگِہ یَکّے نَنگ ءُ نامُوس ءِ نام ءَ کَنَگ ءَ اِنت۔ ناں شُما ماسُوم “بَیٹی” ءُ “بَچّی” اِت ءُ ناں شُمئے ھما بَلاہێں مۆل ءُ مُراد پہ نَنگ ءُ نامُوس یا پہ “ساہِل” ءُ “وَساِل”ئے وَڈێں وَتگَڈێں گالبَنداں چێر تَرِّت کَنت۔ چَہ تَو پَد تَئی دْرُستێں سَنگَت ءُ ھَمکار گِرَگ بیتَگ اَنت۔ کۆدِکێں گُلزادی ءِ ھِچّ ھال ءُ بُود نێست۔ اِے تَئی ءُ لُمَّہ جان ءَ ھَوار کُلّێں شَہید ءُ بے گْوَہانی جُہدانی بَرکَت اِنت کہ مَرچی بَلۆچ ءِ تَوار ماں جَہان ءَ پْرُشتَگ ءُ بَلۆچ کہ وَتی پاگ ءُ پَڈَکَّہ ءِ پَہر ءَ گُرُوناک بیتَگ آ پاگ ءُ پَڈَکَّہی دْرُست پَشَل اَنت پہ وَتی پَشَلی ءِ چێر دَیَگ ءَ وَڈ وَڈێں نیمۆن سازَگ ءِ جُہد ءَ اَنت۔
گۆدی جاں!
تَو بْیا! تَرا پہ وَتی اَژنۆک جۆڈ کُتَگێں راج ءَ اَنگَت باز کار کَنَگی اِنت۔ اِے راج اَنگَت بالِگ نَہ اِنت۔ نۆکی گاماں کَپتَگَت کہ تَرا بُرتِش۔ بَلۆچ ءِ کارَہبَند ئے نِزۆری گُش ئے یا زۆراک ءِ واک؟ رۆچہ ھما رۆچ ءَ کہ بَلۆچ ءَ سُدّ کُتَگ کہ مارا یَکّ سِند ءُ سێدێں ڈێہے ھَست۔ ما شِنگ ءُ شانگ ایں۔ اِشانی ھَواری اَلَّمی اِنت۔ تاں کُجام سَرے کہ چِست بیتَگ آ سَر جَنَگ بیتَگ۔ پِدا اَہمَد بِبیت کہ واجَہ گُلام مَہمَد، لُمَّہ جاں بیت کہ مَنّاں جاں، سَر کہ شُتَگ اَنت مَہلُوک ھَم نَمَنتَگ۔ شَہید پِدا اَہمَد ئے رَوَگ ءَ رَند داں چُنت وَہد ءَ بے تَواری مَنتَگ۔ “بَیٹی” ءُ “بَچّی”، نَنگ ءُ نامُوسیاں گۆں وَتی واجَہ ءَ بَلۆچ ءَ را بَلۆچ بَیَگ ءَ نَِشتَگ، جَتَگ، چُپتَگ ءُ شیرَگ ءُ مۆم کَشِّتَگ اَنت ءُ پاکِستانی ٹۆہارے جۆڈ کُتَگ پہ بَلۆچِستان ءِ دۆشَگ ءَ دێم ءَ داتَگ داں شَہید واجَہ گُلام مَہمَد اَتکَگ چَہ آئی ءَ پَد پہ اَدارے شَہید مَنّاں جان ءَ داشتَگَت دێر ئِے نَکُت داکتَر جاں ھَم شَہید کَنَگ بُوت ءُ بَلۆچ راج ءِ تَہا وَڈ وَڈێں ٹۆہار جۆڈ بیاں بیت اَنت۔ مَیدان ءَ سَرزاہِرا کَسّ نێست اَت۔ پاکِستان ءَ یَکّ اَنچێں اَجَبێں ٹۆہارے آُرت کہ کَسّ ءَ نَزانتَگَت، دْرُست ئِے پِر رِتک اَنت۔ اِے بَریگێں بے تَواری ھَمینچُک سْیاہ ءُ تَہار اَت کہ چَمّ پہ چَمّ ءَ مَیم نَبُوت۔ بلے وَہدے کہ ماہِکانی بُوت داں آ پَدَّر بُوت۔
اُو بَلۆچ ءِ تَہارماہێں شَپانی ماہ ءُ مَہرَنگ! بْیا کہ بے گْوَہ ءُ شَہیدانی وارِس تَئی رَہچار اَنت۔ بْیا کہ ٹۆہار رۆچے رَنگے ءَ رَجێنَگ بَیَگ ءُ دێم ءَ آرَگ بَیَگ ءَ اَنت پہ ماتێں سَرڈِگار ئے دۆشَگ ءَ۔ گۆں وَتی ٹۆہاراں بَلۆچ ءَ رێپێنَگ ءَ باڈا اَنت۔ بْیا کہ ما اَنگَت گێشِ وَتی اَنا ءُ وَتی مَنّارێنَگ ءُ یَکّے چَہ دُمیا سَوَئی بَیَگ ءِ گِر ءُ چِکّ ءَ ایں۔ اِے بَری کا ئے، یَکّ دِگِہ کَراماتے بْیار گۆں۔ مَن ھَمے کہ وَپسَگ ءَ باں کَلَمَو ئے بَدَل بَسّ یَکّ دْوایے، اَرماں کہ چۆ تَرا پہ بَلۆچێں نَدکاراں کَدی چُشێں کَندیلے کہ سَبَ اَت، پَدا بَلیت ءُ رۆک بیت۔ چۆ مُبارِک ءَ شاگ دَنت ءُ اَنوَر ءَ چَمیت ءُ اِے وَپتَگێں پیل ءَ ٹۆہێنیت کہ واجَہ! تَرا ھَم یَکّ زِمَّداریے اِے گُلامێں راج ءِ تَہا ھَست۔ بَلۆچ نَدکار چۆ زیکێں زالبُول ءَ وَتی ھۆرکێں اَندَر ءِ چُلّ ءَ پیشکۆنڈَگ ءَ اِنت بَکَولِ کَندیل جاں چَہ وَت ءَ بے گانَگ اِنت۔ بێدِ ھَمے سئے ءُ چارێں آریپێں کَماشاں واجَہ مَنزُور بَلۆچ، شاہ مَہمَد مَری اَنوَر ساجِدی ءُ سَیێں چارێناں۔ مَن ءَ اُمێت اِنت تَو کہ کا ئے اِے تَک ءَ اَلَّم جێڈ ئے۔
تَئی ماں زِندان ءِ کُوٹیا نِبِشتَگێں کاگَد پہ وَتی یَکّێں بْرات ناسِر جان ءُ پہ گُہاراں وَہدے رَساندَر ءَ دیست تَ تَئی پہ مات ءَ نِبِشتَگێں کاگَد ءِ تْرانَگ ءَ کَپتاں کہ مَن گۆں وَتی پْرُشتَگێں بَلۆچیاں رَجانک کُتَگَت۔ تَو کہ مِسِنجَرا مَنی مِنَّت گِپت، ھاتِرُن وَشّ بُوت۔ مَن اِے کاگَد ھَم رَجانک کُتَگ۔ گۆدی جاں! کَدی دَر کا ئے ءُ وان ئِے ئے ءُ مَنی مِنَّت ءَ گِر ئے ءُ مَنی دِل ءَ وَشّ کن ئے؟ تَئی اِے گَپّ کہ “شُما بِزانِت کہ شُمئے گُہار نِزۆر نَہ اِنت” لُنٹاں پَہری بِچکَندے شِنگِت ءُ مَن شُمئے پہ ھَزارنازێں وَتَنبانۆرێں لُمَّہ جان ءِ سَر کَنَگ ءِ کارَوان ءِ تْرانَگ ءَ کَپتاں وَہدے گُلنِساءَ سَپَر جَتَگَت ءُ اَتکَگَت۔ مَن کہ ھال گِپت اَنت گُڈا گُشت ئِے: “ھَسا اِے لُمَّہ ئے جِند اِنت۔ نُور پاک ئِے ھِچّ مَکَنت، اِے بانُک ءِ جاگَہ ءَ گیپت۔ ھَمائی ءِ ڈَولێں مَلَنگے۔”
مَن کَندِت ءُ گُشت، “ھَو دانکے مَلَنگ ءُ گَنۆکے مَب ئے پاداں داشت نَبَئے لالِ۔ ھَمے پہ وَتَن گَنۆک ءُ آشِکێں وَشرَنگاں بَلۆچ راجی جُنز سَمبَہێنتَگ پہ وَتَن ءِ بانۆری ءَ ۔”
سُہبی تَئی جُست ئِے کُت، مَن گُشت کہ پہ گۆدی ءَ کاگَدے نِبِشتَہ کَنَگ ءَ آں۔ گُشت ئِے بَڈّے بارے سَلام ئِے کَن۔
زیت آجُو بات ئے۔
تَئی نابُودێں رَجانکار
<سترُنگ><اِم>ھَسا بِجّار
چَہ دَرێں دْیارے ءِ پَناگیرێں بُنجُلے ءَ۔