کێنَگی ءَ وَتی اُشتِر ءِ بار ءِ کُلۆنٹ پہ ھَشتاد کَلدار ءَ بَہا کُت، کَلدار دَزمال ءِ لَمب ءَ بَست اَنت ءُ لانک ءَ ماں جَت اَنت، اُشتِر ءِ کۆنڈ بَست اَنت ءُ بازار ءِ تَنک ءَ بُرزاد بُوت۔ آئی ءَ چیزے ساماں گِرَگی اَت۔ آئی ءِ مێتَگ ءِ سَوداگِر ءِ دُکّان ءَ چُشێں اَلکاپێں ساماں نێست اَت۔ اَسُرکَزا ئے وَہد ءَ آئی ءَ چَہ بازار ءَ واتَرّ کُت۔ ھَرچ سامان ءُ تۆشَگے کہ آئی ءَ گِپتَگَت، دْرُست ماں لَچاں کُت اَنت، اُشتِر ءَ رَہت پِر کُت، کۆنڈ بۆتک اَنت، تَنگ شَرّ مُہر بَست ءُ دێم پہ وَتی مێتَگ ءَ رَہادَگ بُوت۔ چَہ بازار ءَ دَر اَتک، اُشتِر ئِے جۆکێنت ءُ جَمّاز بُوت۔ اِے وَہدی مَگرَب ئے تَہاری ءَ ماں شانتَگَت۔ اُشتِر وَتی دِل ءِ مَیلا بارَگ ءُ چَپّ ءُ چۆٹێں راہ ءَ گُلاٹ بُرّان اَت ءُ رَوَگ ءَ اَت۔
مَردُم کہ اێوک بیت، آئی ءَ بازێں ھَیالے کئێت۔ کێنَگی ھَم ھَیالانی رُنگراہاں بُرزاد بُوت ءُ شُت ءُ ھما گْوَستَگێں رۆچانی وَشّێں ساہَتاں رَسِت! ھَمے ھَیالاں آئی ءَ را گْوَنڈێں ساہَتے یَکّ جَنَّتے ءَ بُرت ءُ رَسێنت بلے اِے ھَیالانی جَنَّت چَند ساہَت اَت ءُ دَماںے ءَ رَند آ پَدا ھما اُشتِر ءَ جَمّاز اَت ءُ یَکّ سْیاہێں وَڈّے ءَ اێوک ءَ رَوان اَت۔ نی آئی ءَ وَتی دِلگۆش شَپ ءِ اِستارانی نێمَگ ءَ تَرّێنت، لَگِّت اِستارانی چارَگ ءَ۔ دِل ءَ ھَیال ئِے کُت کہ اِے تَہارێں شَپ ءَ اِے اِستار چۆن تْرِپَگ ءَ اَنت! اِراں، کَسے ءَ اِشانی پێداگ بَیَگ ھَم یات نَبیت؟ اِے اِستاراں بازێں ھَبَرے یات اِنت۔ اِے پیر ھَم نَبَنت! اِے چۆ تْرِپناک اَنت چی ءَ ؟ ھَمینچُکا شَیرے ءِ تَوارے آئی ءِ گۆشاں کَپت۔ کَمّے دیر ءَ گَلَگے دێم پہ ھَمے راہ ءَ پێداک اَت۔ گَلَگ ءِ سارباں یَکّ پُردَردێن ءُ سۆزناکێں شَیرے جَنَگ ءَ اَت۔ آئی ءِ شَیر ءِ سَرہال اِش اَت:
بْیا کہ زَہیر مَن ءَ نَیل اَنت اِنت
رُمب رُمب ءَ جِنِکّ کاینت آپ ءَ
چۆ سَباہ ءِ سارتێں گْوات ءَ
مَن ءَ کَسّ نَدَنت تَئی شۆندات ءَ
بْیا کہ زَہیر مَن ءَ نَیل اَنت اِنت
شَیر داں ھَمِد ءَ رَسِتَگَت کہ چَہ ھَمایاں یَکّ زِندَگدِلے ءَ کُوکار کُت ءُ گُشت: “بُگُش، اَڈ ءِ بُگُش سُتکَدِل کہ اِے دیرسَرێں راہ ءُ سْیاہێں شَپ پہ بے تَواری نَگوَز اَنت۔”
کێنَگی ءِ ھَیال ءَ چَہ اِستارانی تَپّاسَگ ءَ بے رَو کُت ءُ ھَمے شۆر ءُ کُوکار ءِ نێمَگ ءَ شُت۔ کَسے ءَ گُش ئے زانا آئی ءِ ھَیال ءِ تار دَست جَت اَنت۔ آئی ءَ را چِنگ ءَ نَِشت۔ گُٹّ ئِے سَکّ بُلَند ءُ وَشّ اَت۔ ھَمے وَشگُٹّیا آئی ءَ را مَزَنێں دَردے دِل ءَ داتَگَت۔ آئی ءَ ساربان ءِ شَیر ءِ پَسَّو گۆں اِے گالاں بِنا کُت:
باگانی کَپۆت وَشاوازێں
بے تَوارا وَتی رۆچاں گْوازێں
اِمرۆز ءَ وَپا نێست اِنت بازێں
بْیا کہ زَہیر مَن ءَ نَیل اَنت اِنت
چَہ کێنَگی ءِ دَردمَندێں دِل ءَ دَر اَتکگێں اِے چارێں گال شَپ ءِ سْیاہی ءُ تَہاری ءَ دِرّاں بُوت ءُ شُت ءُ ھما گَلَگ ءِ ساربانانی گۆشاں اێر کَپت اَنت۔ ھَردێں نێمَگاں یَکّ بے تَواریے ءَ ماں شانت، دانکہ گَلَگ ھَم اَتک ءُ رَسِت۔
یَکّے ءَ دَرّاێنت: “اَڈ ءِ واجَہ! تَو چَہ کَئی مَردُمان ئے؟”
“کَودا شَہسَوار ءِ،” کێنَگی ءَ جَواب تَرّێنت۔
“تَو چَہ بَندِن ءَ پێداک ئے؟”
کێنَگی ءَ گُشت: “ھَو۔”
“کُلۆنٹ ءِ چِہ نِہاد اِنت بارێں؟”
“ھَشتاد کَلدار،” کێنَگی ءَ گُشت۔
“تَرا ماہیگ گۆں؟ مارا چار دانَگ بِدئے۔”
کێنَگی ءَ چیزے ماہیگ آیان ءَ دات ءُ آیاں چیزے کُلۆنٹ۔ ھَرکَس ءَ وَتی راہ گِپت ءُ شُت بلے کێنَگی ءِ وَتی گُشتَگێں شَیر ءَ آئی ءِ دِل کُدێنت۔
آ وَتی گْوَستَگێں رۆچانی یَکّ وَشّێں ساہَتے ءِ دِلسۆچێں تْرانَگے ءَ کَپت۔ اِے تْرانَگ ماہان اَت، آئی ءِ کَسانی ءِ ھَمبَل۔ بلے آئی ءِ سیر دو سال پێسَر گۆں یَکّ مالدارے ءَ بیتَگَت۔ ماہاں آئی ءِ کَسانی ءِ دۆست اَت۔ آ یَکّێں مێتَگ ءَ رُستَگ ءُ مَزَن بیتَگَت اَنت بلے سیر ءَ رَند ماہان ءِ مَرد ءَ آئی ءَ را وَتی مێتَگ ءَ بُرتَگَت۔ ماہان ءِ مێتَگ کێنَگی ءِ راہ ءِ سَر ءَ اَت۔ یَکّ بَرے آئی ءِ دِل ءَ باز مِرّ کُتَگَت کہ ماہان ءِ جاگَہ ءَ ماں تَرّ بلے آئی ءَ وَتی دِل ءِ ھَبَر ھِچّ کِمار نَکُتَگَت۔
نی آئی ءِ دِل زانا چَہ آئی ءِ جِند ءَ گێش اَت ءُ آ یَڈَّولا ماہان ءِ بارَوا ھَیال کَنَگ ءَ اَت کہ بارێں ماہاں چۆن اِنت؟ بارێں چِہ ھال ءَ اِنت؟ ماہان ءِ دِل ءَ اَنگَت مَنی واہَگ ھَست؟ اِے یَکّ سَوالے اَت کہ آئی ءَ گۆں وَت ءَ کُت بلے چَہ بازێں دَرد ءُ گَماں ٹَپّ وارتَگێں دِل ءَ ھِچّ پَسَّو نَدات۔ پَدا وَت جَواب ئِے تَرّێنت کہ ماہاں کَدی مَن ءَ بے ھال کُت نَکَنت۔ مَن ماہان ءِ چارَگ ءَ اَلَّما رَواں۔
ھما شَپ ءِ بانگواہ ءِ وَہد ءَ آئی ءِ اُشتِر ماہان ءِ مێتَگ ءِ نێمَگ ءَ رَوَگ ءَ اَت۔
ماہان ءَ ھَم پہ کێنَگی ءَ سَکّێں دۆستیے ھَست اَت بلے دُنیا ءِ اِے دۆد اِنت کہ یَپَّیما نَۆشتیت۔ مَرچی دو سال ءَ رَند کێنَگی پہ آئی ءِ مێتَگ ءَ رَوَگ ءَ اَت۔ ناہاری ءِ وَہد ءَ کێنَگی، ماہان ءِ مێتَگ ءَ شُت ءُ رَسِت۔ چَہ یَکّ مَردُمے ءَ جُست ئِے کُت۔ آئی ءَ سۆج دات، “آ ڈَل ءِ دێم ءِ گِدان ءَ گِند ئے؟ ھما ماہان ءِ لۆگ اِنت۔”
کێنَگی ھما مَرد ءِ سۆج ءِ پَدا ماہان ءِ لۆگ ءَ شُت ءُ رَسِت۔ اُشتِر ئِے مَشک ءِ دار ءَ بَست۔ اِے وَہدی ماہاں شیر ءِ مَنتَگ ءَ اَت۔ آئی ءَ کہ کێنَگی دیت، ھینزَک ئِے یَلَہ دات، تَگِرد ئِے گِرّاں کُت ءُ گِدان ءِ پێژگاہ ءَ پَچ کُت۔ کێنَگی نِشت۔ ماہان ءَ چَہ دیر ءَ وَشَّتک کُت، پاد اَتک، سۆدَگے ناہ ءَ پُرّ ئِے کُت، کَدَّہے شیر ئِے چَہ ھینزَک ءَ اێر رێتک، آُرت ءُ کێنَگی ءِ دێم ءَ اێر ئِے کُت اَنت ءُ وَت یَکِّرّا شُت ءُ نِشت۔ کێنَگی ءَ یَکّ دَپارے ناہ چَہ سۆدَگ ءَ زُرت ءُ دَپ ءَ کُت، چَہ کَدَّہ ءِ شیراں گُلاٹے گِپت، چَمّ چِست کُت اَنت ءُ ماہان ءَ چارَگ ءَ لَگِّت۔
دوێں چَمّ ئِے ماہان ءِ دێم ءَ سَکّ داتَگَت اَنت، گُش ئے زانا ماہان ءِ دێم ءَ آ چیزے ءِ شۆہاز ءَ اَت۔ ماہان ءَ سَر چِست کُت۔ دُێنانی چَمّ دُچار کَپت اَنت۔ کێنَگی ءَ وَتی ھۆش بَرجاہ کُت ءُ گُشت، “تَو مَن ءَ پَجّاہ کار ءِ؟”
ماہاں گُش ئے چَہ واب ءَ پَدّرَہِت۔ ھَرد یَکّ دِگِرێارا اَنچۆ چارَگ ءَ اَت اَنت گُش ئے زانا یَکدِگِرا پَجّاہ آرَگ ءِ جُہد ءَ اَنت۔ شَرّێں ساہَتے پہ بے تَواری گْوَست۔ ماہان ءَ جَواب دات: “اِنّاں۔”
اِے “اِنّاں” پہ کێنَگی ءَ جَوابے نَہ اَت۔ گُش ئے زانا کَسے ءَ شِلسَرێں کارچے آئی ءِ دِل ءَ جَت۔ آئی ءَ ناہ ماں دَپ ءَ جَور بیت اَنت، دَست سۆدَگ ءِ تَہا ھُشک تَرِّت۔ مَزَنێں مُشکُلے ءَ دَست ئِے چَہ سۆدَگ ءِ تَہا دَر کُت ءُ گۆں چادِر ءِ لَمب ءَ پَہک ئِے کُت، پاد اَتک، سَواس ئِے پاد ءَ کُت اَنت، اُشتِر ئِے چَہ مَشک ءِ دار ءَ بۆتک۔
ماہان ءَ دَرّاێنت، “تَو بارێں ناہاری نَکُت؟ ساہَتے بِجَلّ، ناہاری بِکَن۔ مَنی لۆگواجَہ چَہ رَمَگ ءَ کئێت، گَرم ءَ سارت کَن، گُڈا بُرَو۔”
کێنَگی ءَ پہ پَرِّتَگێں گُٹّے جَواب تَرّێنت، “تَو کہ مَن ءَ پَجّاہ نیار ئے، پہ مَن اِے سارتێں ساہِگ گَرم اِنت۔ چَہ دَرامَد ءِ سارتێں ساہِگ ءَ وَتیگ ءِ رۆچ ءِ سَر شَرتِر اِنت۔ تَئی ساہِگ پہ مَن نی سارت نَہ اِنت۔”
کێنَگی ءَ وَتی اُشتِر مَہار کُت ءُ رَہادَگ بُوت بلے نی آئی ءَ را پاداں جَواب داتَگَت۔ آئی ءِ جِند راہ ءَ رَوان اَت بلے آئی ءِ رُوہ چۆ بِرّێں آہُوگ ءَ ھَمے ڈَل ءِ دێم ءَ پہ وَتی جِتا بیتَگێں ھَمبَل ءِ شۆہاز ءَ پِریات کَنان ءُ سِرّ بَندان ءَ رَوَگ ءَ اَت۔
<سترُنگ><اِم>مُراد ساہِر