کاڈ مَنی اُو چاڈ مَنی
تُلُّس، گَولُک، لاڈ مَنی
دَرد، گَم ءُ آلاڈ مَنی
تَرا بے مَن پَرچی وَشّ نَبیت
تَو ھَمرَہ بَئے، اُو زِند ءِ سَپَر
آسَن گْوَزیت ھَر گَپّ ءُ ھَبَر
مۆنجاں نَبیت بے مۆہێں جَگَر
شَپ دْراجکُنێں بَنت سَہت ءُ دَماں
اَرزاں بَ اَنت اَرس ءُ اَرماں
مَوج سَباہ ءِ لَہم لَہمێں
تْرانَگ، یاتاں پِرّێن اَنت
دَم سِٹّ جَن اَنت ءُ سِرّێن اَنت
بْیا رۆچ نَوَشّێں پِر گْوَستَگ
مَجنُون ءُ گَنۆکانی دَشت ءَ
دِل اێر گُش ئے پہ سَوگاتے
آزمان ءُ زِمینانی تَشتا
تَو لُنٹ سُرێں اُو کاگَدرَنگ
مَن زامُر بَکشایاں ھَمسَنگ
داں ھُلّ نَبَندیت مِستاگے
چَہ مَن وَتی اوں رُو ءَ گِر
جی باتِن سۆزانی سازگِر
مَن ءَ سۆچ، شَمۆش اوں یات مَکَن
ھۆن ءِ واہَگ ھَشّ نَبیت
تَرا بے مَن پَرچی وَشّ نَبیت
<سترُنگ><اِم>گُل مَہمَد وَپا