دَرد ءِ اَبێتکی اِنت کہ دِل ءَ دَز جن ئے کُدیت
نوں اێوکی، پہ شَیر تَسَلّا دَیَگ نَبیت
مَرچاں اِے دَہر ءِ کاسَگ ءَ ھَرچی ھَوادَگ اِنت
بایَد نوں کْوَہنێں مۆسُمے وَشّاں کَنَگ بِبیت
رُستَگ کَرار ءِ سَبزُکێں نازێنکے باتِن ءَ
تَئی گِلَّہانی شَہم ئِے بِلَگّیت، تَہا مِریت
ھَر چَمّ آگَہ اِنت، وَتی وابانی گْوانزَگ ءَ
بارێں کُجانگ چۆرَہێں پِریاتے اِنسِریت
رۆچ ءُ شَپانی گْوازی ءَ ، اَرواہ نَمۆکِتَگ
اِنساں اَنچێں لَیبُوے، لَیب ءِ تَہا پْرُشیت
سَبزیت تَیاب، ساوَڈ ءِ چَولاں زَہیر کَنت
دُنیا شِکَستێں بۆجیے لُڈّاں کَنت گْوَزیت
ھیسکارَگانی دَشت، مَنی شَہرَگ ءَ بُن اِنت
چۆ ھَم نَہ اِنت کہ جَنگَل ءِ مُرگاں سَما مَبیت
مَرچاں اِے چَمّ، رِتکَگێں اَرساں وَتی نَکَنت
مَرچاں اِے دِل ھَمێش اِنت وَتی دْریکَّگاں گُڈیت
باندات ءِ سُہرێں بْرانز مئے ھۆن ءِ اَمانَت اِنت
کۆرێں زِمین ءِ دیدَگاں سَبزێں گَمے رُدیت
تَئی یات لَڈّ ءُ بار بِکَنت، مێتَگ ءِ دِل ءَ
جێڈاں کہ ھۆرکێں دَمکے ءَ بِچکَندے پَش کَپیت
اَرماں، ما کہ مۆسُم ءِ گاری شُہازِتَگ
کَسّے بَیَیت، گۆں مَن ءَ گْوات ءِ پَداں بِگیپت
<سترُنگ><اِم>ھالِک اَرماں