Nawáb Agbar Hán Bogthi

کئے شُمار کُت کَنت بُرز ءِ اِستاراں
اَندَر ءِ دَرد ءِ کئے کِساس ءَ زانت
کَسّ نَگِندیت آ گْوَرتَگێں تیراں
مَنی ڈۆبَر ءَ پیرێں بیتَگ اَنت پَیوَست
زی گُباراں شَرّ گِپتَگَت پیرکۆہ
ڈێرَہ مَنی شَبدێم اَت مُجاں سْیاہێں
دامُن ءَ کۆہ ءِ جِکّ جَت ءُ نِشتاں
مُہر پَتات میان ءَ زُرت کَمَرزانی
گَپّ جَت ءُ کَندِت گۆں بَزێں رێکاں
پۆلِت اَنت بے گاہی پْرُشۆکێں بْرَمش
مادَرێں ھَنکێن ءِ پِڈاں پْراہێں
شانک وَتی دات اَنت مَن گَیابێں چَمّ
گۆں کُت اَنت بیبَگرێں دِل ءِ اِہوال
گۆں تَلّ ءُ شێپانی بُتکَگێں گْوات ءَ
مَلکَمُوت چۆ مَستێں لێڈَو ءِ داب ءَ
پہ مَن پێداک اَت چَہ پُشت ءَ کۆہانی
تْرَکِّت اَنت بَمب ءُ شِنگِت اَنت شۆرَہ
چۆ دُزّێں شاہین ءَ کُت گُراباں ھینژ
ماسَگے بَست ءُ دَہ بَر ءَ پَرّێتک
آکِبَت چے بیت رَندِ مَن ڈێہ ءِ
گۆں وَتی دۆزواہاں کَمَربَندێں
مَن ھَشیم گِپت ءُ پَیکِری نِشتاں
نِشتاں گۆں سێوائی جَوانمَرداں
چۆ نَزانت بَدواہاں لَگۆرێناں
ما بَلۆچ این ءُ مَرگ بَہا زیرێں
مئے دِل نِہِنگانی پْرُشتَگێں گْوَرم اَنت
آہِن اَنت ڈیل ءُ کۆہ مئے بالاد

یَکّ گْوَرے بالاچ اَت مَزَنمَرّێں
یَکّ گْوَرے بْراہُندَگ کَسانزاتێں
مِکّ اَت چۆ کۆہ ءَ دێم ءَ نۆدبَندَگ
مُچّ اَت اَنت وَرنا مَنی چَپّ ءُ چاگِرد ءَ
بَچّ مَنی تَنگَو ءُ مَزاربیمێں
ھۆنِش چَہ مَلّێں دیدَگاں پِٹِّت
گُلگِش چۆ کاش ءَ دْراج اَت اَنت زێبێں
چۆٹَوِش زَرّێں چۆ بْرِستَگێں ساد ءَ
(ءُ) بَرۆتِش چۆ ڈَنگجَنێں زیم ءَ
بارَگێں میان ءَ اَت کَتار نَکشێں
کُبل اَت اَنت تیر چۆ زَردُکی گْوَبز ءَ
کۆپَگاں سیتیری کَلَمگۆشێں
دێم پہ دێم بیت اَنت گۆں سِلّێں ھِنزیراں
چۆ رَگام گْوَرتَگ گۆنڈَلێں تیراں
شَہم کُت ماں شێپانی تَہا گْرَنداں
سئے شَپ ءُ سئے رۆچ داشتَگێں جَنگاں
کَپتَگ اَنت کۆہانی سَر ءَ دُمبال
سُتکَگ اَنت آساں اێمِنێں اَرواہ

ھَرکَس زانَگ بیت چَہ وَتی بے ھ ءَ
دَستِ وَت بَکشائیں چِتَور ڈێہ ءَ
"سَکّیاں بْرات گۆں مَرکَباں کۆشت اَنت
شَکَّلێں جَنگانی پِڈاں بَچّیگ
پَد نَکِنز اَنت گۆں جُگڈیاں دۆزواہ
وَشّیاں ھاتُونێں جَن نۆش اَنت"
مات دُبَر پێداک کَنَت بَچّاں
زِندَگ اَرواہ بَنت رَند چَہ مَرگ ءَ
ھۆن شَہیدانی پُلّ رۆدێن اَنت
چۆن بَنت سِنگانی نَپس بَندیگ
ساہاں کئے اێر دَنت ماں اَندَر ءَ کَبر ءِ
لۆٹ نَبَنت بَندیگ گۆں تَوک ءُ زَمزیلاں
نئے ھَیال بَند بَنت سِنگێں زِنداناں

سَگّ ءُ اوپار ءَ ھَست گُش اَنت ھَدّے
چۆن بیت چارَگ گۆں وَت ءَ بْرَہنَگ
وَردِنی چیے آس نَہ اِنت رۆکێں
ءُ رُژن تَہاری ءَ چۆن بیت دَزگیر
دْرَنگ پُلَنگانی بے رَسێں گَٹّ اَنت
تۆلَگ ءُ رۆباہی نَبَنت وابجاہ
تَو سَتَر واہُند ءِ دو سَد لَکّ ءِ
بے دِل ءُ نێمبُندێں سِپاہیگ ءِ
پہ دَپ گِر ئے اِسلام ءِ مُدام نام ءَ
چِرِّکِت پاد ءَ اِنت وَتی بے ھی
تَئی اَندَر ءَ واب اِنت ھَتُّوێں بَکّال
مات تَئی ھِندی ناچُوے زان ئے
سازگِرے پِت تَئی بادشاہبَکشێں
بێر گِرَگ لۆٹ ئے چَہ مَن ءَ بَلکێں
مَن تَرا لَٹّ داتَگ کُتَگ دیندار
شَرّی ءَ زان ئے چاکَرێں رِند ءَ
جۆن ئِے ماں دِلبَند ءَ تَئی کَلّ اِنت
گازی مَنی بْرات اِنت ڈێرَہ ءِ مَلّێں
تۆنسَہ ءُ مُلتانا بِگِر جُست ءَ
گْوَستَگ اَنت کَرن ءُ دَہ سَدانی سال
گْوانزَگی تِبل تَئی، پَچ گُڈ اَنت بیم ءَ
تَنگ نَہ اِنت گامێشے تَئی سْیاہێں
جۆہَڈاں میسێنیت وَت ءَ سَدبَر
رۆچہ رَہمانی تَو مَگِند واب ءَ
چَہ وَتی بِستار ءُ گُشاد ءَ گێش
'اِے کۆہ سَگاراں گۆں گِپتَگ اَنت مَرداں'
نۆشِ جاں چۆن بَنت چۆ تادَل ءَ سِندی
زْیارَت ءُ پیری مَرد نَہ اِنت گْوَندُو
نَئکِہ اَولاد اَنت داتَگێں پیری
پَد وَتی ھَکّانی جَنَگ زان اَنت
وَتی بے رْگِرێں پَجّار ءِ پَدی رۆچاں

“مَن کَناں اَنچُش گۆں تَرا مَرچی”
مێد گۆں ماہیگاں ماں زِراں جُہلێں
گۆں کَہیرانی شَنگَراں لێڈَہ
تُوشتِر گۆں تَلّانی چِگِردپُلّاں
کایگِر گۆں ھُشک ءُ ڈَنگَرێں بَونڈاں
گۆں جِنگُلاں بانز ءُ بارَگێں شاہین
تَپتَگێں رۆچ ءُ سْرُومَگێں رێکاں
آس کُتَگچێرێں لۆہیگی آپاں
اِشکِر گۆں پُلپێٹێں پُرانیگاں”

زیر بِجَن اِمرۆز ءَ وَتی بَڈّ ءَ
وَت کَپ ئے رۆچے کۆتکَگێں کَڈّا
گۆشت تَئی جان ءِ دیر بیت ھَڈّ ءَ
کہ پْرُشتَگێں اُشتِر اَتک نَکَنت لَڈّ ءَ
بے تۆشَگ ءُ آپ ءَ شْوانَگے وَڈّ ءَ
آیَگ اِنت تُوپانے زیر وَت ءَ چَڈّ ءَ
مَنی وارِس اِنت نَتّا ءُ لَوَنگ سْیاد اِنت
نۆش کُت اَنت شیر مَن زی پَنێربادێں
زیر وَتی جَرنێلاں کَش ءَ نادێں
کہ نێش تَئی ھاشگۆر ئے تْرِپ اَنت کادێں
جاں مَنی سِندی جۆگیاں بَستَگ
داتَگ مَن ءَ تاید کَلَّگ ءِ شَیہاں
پاگ مَنی سَوگاتێں مَزاری اَنت
چادِر مَنی شێربیمێں لِگاری اَنت
بَچّ مَن زَہری اَنت تَمَنپرۆشێں
بْرات مَنی رِند ءُ کۆپَگ اَنت گۆرگێج
بے لی اَنت ھَنگامێں رَیسانی
ھَمرَکاب دینارێں مَلِک میراں
سَنگَر مَنی مُولائی گَرێں شَہجُو
دِل وَتی لاکۆٹێں کُتَگ دَستاں
وارتَگ وَتی جِند ءِ مَن دُبَر سَوگِند
مَن کَناں کارے گۆں تَرا اَنچێں
پہ پَدی رۆچاں دَپتَر ءَ راج ءِ
نۆک بِمانیت یَکّ کِسَّہے کْوَہنێں
پَہر بِبَند اَنت گۆں سێنَگاں پْراہێں
مَنی بَزَّگێں راج ءِ شێردِلێں وَرنا
سَوت ءُ نازێنکاں شَرّ مَنی نام ءِ
ساہَت ءُ آرۆسی مَراگاہاں
پہ ناز پِر بَند اَنت مَنی مِلَّت ئے دُہتَر
لَڈ شَہیدانی دْراج بَلۆچ راج ءِ
گۆں ھَمایاں مَن ھۆر باں باندا
پہ کَسّ ءَ پادار نَبیت بے لاں
اِے دُرۆچی زِند ءُ کُوڈَوێں اِمرۆز
مَلَّگے مَرگ ءَ گۆں کَناں اَنچێں
گێدی ءَ پَشت گێجاں دُبَر نامے
پہ وَتی راج ءَ نۆکێں یاتگارے
بَژن بیت بَدواہ ءُ جَہاں گِندیت
(یَکّ) پیرمَردے ءَ پہ سَرانپیری
مێڈ چۆن دات گۆں دُژمِنێں مَرداں
ھۆن تَلَمبانی ساہِگ ءَ تَتک اَنت
ءُ پُسَّگاں شێرێں نَرمَزارانی
باج نَدات باجُوێں اَبێلیاں
بیت اَنت ساہ آجُو ءُ رَپت اَنت پہ شانے
لَہمُکێں تْرَمپاں گْوَرت تَلاردێماں
مَردوَرێں کاہان ءِ ھَمُک شێپ ءَ
تَمبَوێں گۆرکاہاں سَر پَدا کَشِّت

کئے مِریت گۆرانی ڈَلێں سْرُمباں
چێر تَرّ ءِ تَو گۆں مئے گْوَرگِنداں
زِندَگ بَنت اَرواہ داں بِمانیت زِند
مَرگ نَبیت تاواں بے رْگِرێں مَرداں
چۆن کن ئے بَندیگ تَو سَرجَمێں راجے
چۆن جن ئے زَمزیل پِگر ءُ اَپکاراں
سْیَہتَلار اَنت مَنی مُہکَمێں وَرنا
آہِن ءُ کۆہِنگێں کَلات بُرزێں
بانز ءُ شاہین اَنت بُرزێں کۆہانی
دیدَگ اَنت پُرتۆسێں مَزَنکۆٹ ئے
پَچ گِر اَنت ھَنکێن ءَ وَتی ماتێں
پَد جَن اَنت ھَکّاں چَہ تَرا باندا
وارتَگِت بَنگ تَو نوں مَبُو اێمِن
پہ تَو پێداک اِنت مَلکُومَت اَلَّم
(ءُ) زِند تَئی سادێں تُورَگ ءَ بَستَگ
شێر بَلۆچانی مَکَّہێں ماتاں
وارتَگ سَوگِند ءُ سَر دُبَر بَستَگ
کہ نۆک کَنێں پێدا ما سَد ھَزار اَگبَر
کَمبَر ءُ دۆدائیں لَوَنگ میرێں
"بێر بَلۆچانی داں دو سَد سال ءَ
زَگر ءُ وَرنا اِنت نۆک دُدَنتان اِنت"

<سترُنگ><اِم>گُلام ھُسَین شۆہاز