مَنی دۆستیگێں گُہاران ءُ یَکُّلێں بْرات ناسِر جاں!
مَن زاناں کہ مَن شُمارا چۆنێں سَکّیانی دێمپاں کُتَگ ءُ چِتَور شُمارا دْرُستاں اِے کَسانسالیا یَکّ بَرے پَدا جَنجالاں پِرّێنتَگ۔
ما چَہ 2011 ءَ اِے گْرانێں جاوَرانی دێمپاں ایں۔ بلے مَرۆچی بَلۆچانی ھَر لۆگ ءَ ھَمے کِسَّہ سَر اِنت۔ ھَردێں نِزۆر تَرِّتِت گُڈا وَتی چَپّ ءُ چاگِرد ءَ سَیل کَنِت۔ مَن سَرپَد آں کہ شُمئے دْرُستانی ڈُبَّو مُدام مَن وَت زُرتَگ، پہ ھَمے اوست ءَ کہ اِے گْرانێں بار شُمئے کۆپَگاں مَبیت۔ بلے بَلۆچِستان ءَ نِشتَگ ءِ اِے وَڈ بیت کَنت، بَلکێں چِد ءُ گَنتِر ھَم بیت کَنت، پہ اِشیا وَت ءَ دِلجَم کَنِت۔ زِندان ءَ مئے اَوَلی گِندُکی ءِ ساہَت ءَ اَوَلی بَر ءَ مَن وَت ءَ شُمئے دْرُستانی تَہا دیست۔ ھما بے کَراری ءُ پِگرمَندی، پَدا چیزانی ھما داب ءَ آرَگ ءِ بے سَبری، ھَمِشیا گُش اَنت ھۆن ءِ سْیادی، بلے مئے دَست چے ءَ رَسیت؟ اِے ھَم مئے بَہت ءَ کَپتَگ ءُ ھَمُک بَلۆچ ءِ بَہَت اَنچُش اِنت۔
اِے کاگَد ءَ مَن چَہ جێل ءِ کُولی ءَ نِبِشتَہ کَنَگ ءَ آں پَرچا کہ گِندُکی ءِ وَہد ءَ مَن ھما دْرۆستێں گَپّ جَت نَکُت اَنت کہ مَن ءَ جَنَگی اَت اَنت۔ اِے زِند پہ مَن یَکّ نۆکێں تَجرُبَہے۔ مَن اَنگَت گۆں وَتی بْرات ءُ گُہاراں ماں زِنداںے ءَ گَپّ کَنَگ ءِ وَڈ ءُ پَیم دَر نَبُرتَگ۔ مَن لۆٹاں شۆم ءَ را دِلبَڈّی بِدَیاں بلے مَن ءَ لَبز نَمَرّێنَگ ءَ اَنت۔
نی مَن ڈَڈتِر بَیاں آن ءُ وَہد ءِ ھَمراہی ءَ شُما ھَم ڈَڈّ بِت۔
یات بِدارِت کہ وَہدے مئے پِت شَہید کَنَگ بُوت، آ وَہدی مَ چِتَور ھۆر بیتێن ءُ وَت ءَ ڈَڈّ کُت۔
مَنی واہَگ اَت کہ چۆرَوی جاگَہ ءَ ھَم شُمئے زِند چَہ وَشّی ءَ سَرّێچ بِبیت۔ مَن اِے اُمێت داشتَگَت کہ شُما بِہ پُلُوس ءِ چاپَہ ءُ جێل ءِ دَروازَگ ءَ مَگِندِت۔ بلے مئے دَست ءَ چے بیت؟
اِے آزماِش گَہگیری زِند ءِ تَہلێں راستی اَنت۔ بَلۆچِستان ءَ ما وَتی مَنشا ءِ زِندے گْوازێنت نَکَنێں۔ دێمتِرا چِد ءُ گْرانِر بیت کَنت، آسانتِر نَبیت۔
مئے پِت ءَ اِے پَیسَلَہ کُت ءُ وَت ءَ را پہ بَلۆچ ءِ ھَکّاں نَدر کُت۔ ءُ آئی ءَ رَند، ما دْرُستاں ھَمائی ءِ پِگر ءُ لێکَہ زُرتَگ ءُ گۆں ھَمے جُہد ءَ بَندۆک بیتَگێں۔ نی اِے گْرانێں وَہد ءَ شُمارا یَکّے دُمیگ ءِ ھَیال دارَگی اِنت ءُ یَکّے دُمیگ ءِ کۆپَگ بَیَگی اِنت۔
بِہ مَشَمۆشِت: اَسَلێں واک ھَڈّ ءُ بَندانی نَہ اِنت، دِلَئێگ اِنت ءُ لێکَہَئێگ اِنت۔ وَت ءَ چَہ تَہا مُہر کَنِت، لێکَہی بُنیاد ءَ مُہکَم بِبِت۔ یَکّے دُمیگ ءِ کۆپَگ بِت۔ بِہ وَت ءَ نِزۆر بَیَگ ءَ مَیلِت، ءُ اِے گَپّ ءَ مُدام یات بِدارِت کہ شُمئے گُہار نِزۆر نَہ اِنت۔ نِزۆری مئے بے ھ ءَ ماں نێست۔
اِے وَہد اِنت مُہکَم بَیَگ ءِ، زُبان ءِ مۆکَگ ءِ ءُ وَتی بَلۆچێں بْرات ءُ گُہارانی ھَمکۆپَگی ءَ اوشتَگ ءِ۔
ھُدا ءِ مْیار اِت۔ ھُدا بَلۆچِستان ءِ نِگَہپاں بات۔ اِے وَہد ءَ کہ مَن اِے کاگَد ءَ نِبشتَہ کَنگ ءَ آں، نَزانا کہ اَئید کَدیگ اِنت، بلے شُمارا ءُ وَتی راج ءَ پێشَگی اَئید مُبارِک گُشاں۔
گۆں نێکێں واہَگاں
<سترُنگ><اِم>مَہرَنگ بَلۆچ
(چَہ زِندان ءِ کُولی ءَ نِبشتَہ کُتَگێں، پَشَّمبِہ، 27 مارچ 2025)
بَلۆچی رَجانک: <سترُنگ><اِم>ھَسا بِجّار