“ھَلَو۔”
“ھاں۔ ھَلَو۔”
“کِتاب رَسِت؟”
“ھَو۔ مَرچی۔”
“چۆن آُرت ئِے؟ جاگَہ ئِے زانت؟”
“ھَو۔ پَون ئِے کُت۔ گُشت ئِے ھَمے دُکّان ءَ کہ کِتاب اێر کَنَگی اِنت، اِے بَند اِنت۔ مَن گُشت بۆشت یَکّے دێم دَیاں۔”
“تَو مات دێم نَدات نہ؟”
“اِنّاااں۔ مات تَئی کِتاب ءَ بِگِندیت مَنی جِند ءَ کُشیت۔ تَئی سَر ءَ گُنج ءَ زَہر اِنت۔”
“چی ءَ ؟”
“گُشیت جِنِکّ ءِ دِشتار ئِے بَراێنتَگ۔”
“ھاااں؟ دِشتار وَ تَو وَت یَلَہ دات۔”
“ھَو بلے مَن مات ءِ کِرّا تَئی نام ءَ کُتَگ۔”
“تَو زَبر ئے۔ کار ءَ وَت کن ئے، نام ءَ مَنی کن ئے؟”
“چۆن کَناں۔ مات ٹَہێنَگی اِنت۔”
“تَو چُشێں ٹَہێنۆکے ئے گُڈا مارا ھَم ٹَہێں گۆں۔”
“مات ءِ دَست ءَ دَیاں، تَرا وَت ٹَہێنیت۔”
“مَن ءَ ھَیر اِنت۔ بِچار کاسِد ءَ مات ءِ دَست ءَ نَرَو ئے ئے کہ دُمی پادا ئِے مَپرۆشیت۔”
“لَنگے زاناں؟”
“ھَو۔”
“اَلّ ئے۔ مَن نَزانتَگ۔ مَن بَزَّگ ءَ را داں نێم کَلاک ءَ ھَمۆدا اوشتارێنتَگ۔”
“پَرواہ نێست، وَتیگے۔ اگں زَہم جَنت شَیرے بَندیت۔”
“اُو بابی۔ شاِرے زاناں؟”
“ھَو۔ بَلاہێں۔ تَو کَریم کاسِد ءِ نام نَِشکُتَگ؟”
“اِشکُتَگ۔ اِے ھَمے کَریم کاسِد اِنت؟ مَن گُشتَگ زاناں اَنچُنائیں کاسِدے۔”
“نہ بابا۔ اِے اَسلی کاسِدے۔”
“کَریم کاسِد تُمپ ءَ نَنِشتَگ؟”
“نِشتَگ تُمپ ءَ بلے مَرچاں تَئی شَہر ءَ اِنت۔ سَبز بات ٹیوی ءَ کار ءَ اِنت۔”
“گُڈا گِندَگ نَبیت؟”
“کاسِدے نہ۔ چێرُکائی کار کَنت… ھاہاہا۔ پُشت ءَ نِشتَگ، رَجانک کَنت۔”
“چے کَنت؟”
“رَجانک۔ تْرَنسلَتیُن۔ تَو بَلۆچی نَزان ئے؟”
“زاناں وَتی کَچّ ءَ ۔ تَو گْرانێں بَلۆچی کن ئے، مَن سَرپَد نَباں۔ بلے شَرّ اِنت۔ بِکَن۔ مَن سِکّاں۔ تَو مَن ءَ رۆچے لَبزے بُگُش گۆں۔”
“مَن ءَ اِینچُک سَردَردی تَہمبُل نَکَنت۔ وَت بِسِکّ۔ کاسِد ءَ زان ئے چۆن کُتَگ؟”
“ھاں۔”
“ٹیوی ءِ جِنِکّے ءَ مَنی کِتابے داتَگ ئِے۔ گُشتَگ ئِے اِشیا بواں تَئی بَلۆچی شَرّ بیت۔ مَن کاسِد ءَ را گُشت۔ دَُوت! تَو مَنی کِتابانی سَر ءَ آشِکی کَنَگ ءَ ئے؟ چِست ءَ دَرّاێنت ئِے تَو بارێں مُنیر مُمِن ئے شَیرانی سَر ءَ آشِکی کن ئے۔”
“ھاہاہا۔ راست گُشیت۔”
“راست گُشیت؟”
“ھَو، تَو گۆں مَن اَنچۆ کَنَگ ءَ ئے۔”
“مَن بَرے بَرے جۆش ءَ باں مُنیر ئے شَیرے دَپگال کَناں بلے گۆں تَو آشِکی کَنَگ ءَ نَہ آں۔”
“ھاااں۔ گُڈا چے کَنَگ ءَ اِنت، واجَہ؟”
“اِشک۔”
“مانا یَکّ اِنت۔”
“یَکّ نَہ اِنت۔ آشِکی سُبَکّێں چیزے، اِشک گْرانێں چیزے۔”
“ھاہاہا۔ باز زان ئے تَو۔ تَئی اِشک اَنت ءُ دِگِرانی آشِکی، ھَو؟”
“ھَو۔ آشِکی گۆں ھَرکَس ءَ بیت، اِشک گۆں یَکّے ءَ بیت۔”
“شَرّ اِنت۔ شَرّ اِنت۔ گُڈا ھما جِنِکّ ءِ بَلۆچی شَرتِر بیتَگ؟”
“اِنّاں۔ اِشی ئے بَلۆچی بِہ شَرّ نَبیت۔”
“تَو چۆن زان ئے؟ بَلکێں تَو ھَم وَتی جُہداں کَنَگ ءَ ئے؟”
“ھاہاہا۔ اِنّاں۔ کاسِد مَن ءَ کُج ءَ وار دَنت۔”
“پَو! اِے لَنگ ھَم دارَگ نَبیت۔ چِتَو لَنگ بیتَگ؟ بَلکێں ھَمے آشِکیانی سَر ءَ ؟”
“ھاہاہا۔ اِنّاں۔ کَسانی ءَ تَپے ءَ گِپتَگ پَدا لَنگ بیتَگ۔”
“اِلاج نَبیت؟”
“اِنّاں۔ پَکّائیں اِلاج نێست۔”
“مَنی بَلُّک ھَم لَنگ اِنت۔ داکتَر گُش اَنت نَبیت۔”
“دَرکَسانی لَنگ اِنت؟”
“اِنّاں۔ اَنّی چیزے سال اِنت۔ کۆنڈ ئِے نَبَنت۔ داکتَر گُش اَنت پَہرێز لۆٹیت۔ کۆنڈاں دُتَل مَکَن۔ سَرسُلۆنٹُکی مَنِند۔ بُن ءِ بَدَل ءَ تَہسَرا بِنِند۔”
“شَست ءُ شِکَست۔”
“چے؟”
“شَست ءُ شِکَست۔ بَلۆچی بَتَلے۔ بِزاں مَردُم شَست سال ءِ اُمبر ءَ رَسیت پَدا شِکَست ءُ آجِز بیت۔”
“اِنّاں۔ اَنچێں پیرێں ھَست سَد ءَ سَر اَنت، اَنگَت تْرَدَّگ ءَ اَنت۔”
“کَمُّکے کَمتِر ئِے نَوَر ئے؟”
“راستی۔ گِنِزبُکّا مان اِنت سَد سالی بَلُّکے ءَ اُلِمپِک گْوازیاں پیرێنانی تاچ کَٹِّتَگ۔”
“اِشیا شَرّ نَکُتَگ۔”
“چۆن؟”
“بایَد اِنت بَلُّک ءَ شَست ءُ شِکَست ئے ھَیال بِداشتێں۔”
“ھاہاہا۔ تَو کہ شَست ءَ رَس ئے شَست ءُ شِکَست ئے ھَیال ءَ بِدار۔ بَلُّک ءَ بِلّ کہ تَچیت۔”
“تَچَگ پیرێنی لَیبے نَہ اِنت۔”
“کَسے تَتک کَنت، بِلّ ئِے تَچیت۔”
“مُپتا چی ءَ کَماشاں پْرۆشائین ئے؟ پیرانَسریا دِگِہ لَیب ھَم بیت کَنت۔”
“چے؟ پَتّائی؟”
“اِنّاں۔ دِگِہ۔”
“دِگِہ کُجام؟”
“وَڈ وَڈێں۔”
“کُجام وَڈێں؟”
“ھما وَڈێں۔ ھاہاہا۔”
“سْتُوپید!”
“راست گُشاں۔ لَہتے لَیب پیرانسَری ءَ شَرّتِر بَنت۔ کَسانی ءِ گَپّے۔ مارا ھَمساہِگے ھَست اَت۔”
“شُت کِسَّہ!”
“ھاہاہا۔ ھَو۔ بے کِسَّہ ءَ تَو سَرپَد نَبَئے۔ اِے مَرد ءِ جِند پیر اَت بلے جَن ئِے کَسان اَت۔ دُمی جَن اَت ئِے۔ اَنچۆ کہ سَرشَپ بُوت زال ءِ کِٹی کِٹیانی تَوار اَتک۔ مێتَگ ءِ لۆگ کَرگین ءُ کُڈُّو اَت اَنت۔ دیوال ءُ کَمپاں نێست اَت۔ پَمِشکا ھَر یَکّے ءَ وَتی ھَمساہِگانی بْرَمش ءُ چِڈِکّا اِشکُت اَنت۔ مَن مُدام ھَیراں بیتَگاں اَنچۆ کہ سَرشَپ بیت اِے زال چی ءَ کَندیت؟ رۆچ ءَ گِندان ئِے، بِہ نَکَندیت۔”
“آ وَتی کَندَگاں شَپ ءَ کُٹّێنیت نہ!”
“ھاہاہا۔ ھَو۔ مَزَن بیتاں گُڈا سَہیگ بیتاں کہ پیرمَرد ءَ کِلی کُتَگ ءُ آئی ءَ کَندِتَگ”
“یااا! کِلی کُتَگ ئِے؟ چی ءَ ؟”
“اَنچۆ۔ لَیب لَبائی۔ پیری ءِ لَیب ھَمِش اَنت۔ مَردُم دِگِہ ھِچّ کُت نَکَنت، نِندیت، ڈێک ءَ کِلی کَنت۔”
“یااا!”
“مَن پیر باں اَنچۆ کَناں۔”
“سْتُوپید!”
“دِگِہ چے۔ پیرانسَری ءَ مَردُم چونایا دِگِہ کار کُت نَکَنت۔”
“کُت کَنت۔”
“چے کُت کَنت؟”
“تَو نَزان ئے؟”
“اِنّاں۔”
“نۆرۆز ءُ اَکبَرا چے کُت؟ ھَیر بَکش ءُ ماما کَدیر چے کَنَگ ءَ اَنت؟”
دْراجکَشّێں بے وانکی…
<سترُنگ><اِم>ناگُماں