ھَر چارێں لَوہاں گێدی ءِ
ھَرچ بَیرَمێں تاک ءِ سَر ءَ
راجدَپتَر ءَ پێداوَر اِنت
یَکّ دْرۆشُمے بے دَروَرێں
گۆناپے تَنگَہ ءُ نُگرَہێں
یَکّ نامے اَگبَر بُگٹی اِنت
گۆں شاِری ءِ وَندَواں
یَکّ زَرنَوِشتێں کِسَّہے
مان اِنت جَمّار ءَ دِلاں
دَہر ءِ دَگّ ءُ ھَرچ نَوبَت ءَ
کَرنانی پَہنات ءَ شِریت
مَردے بَلۆچے ھِزمے اَت
پہ نۆکێں پَرَنگاں ھَمَّل اَت
ماں چاگِرد ءِ تَہلێں جاوَر ءَ
اِے ھَستێں دَور ءِ چاکَر اَت
راج ءِ سَر ءُ سَردارے اَت
شێرِ بَلۆچِستان اَت آ
رَکّێنَگ ءَ ڈێہ ءِ وَتی
بالِشت ءُ کۆٹ ئِے یَل کُت اَنت
گار ءُ ھَشیمانی تَہا
گَٹّێں تَلانگانی شَم ءَ
بُوت کُہمَزارے کُہدار
گَلماشت کُتَنت ئِے دَینکار
باج مێڈ ءِ بُرت ئِے سَرجَم ءَ
سَر گْوَست وَتی ھَیسی سَر ءَ
چۆ کَمبَر ءَ بُوتَگ شَہید
نام ئِے نَمیراں کُت وَتی
پہ رَندپَد ءِ بے ل ءُ یَلاں
تِگرێچ ئِے دَر گِپت مِنزِل ءِ
بَندیگی ئے لُنجێں شَپ ءَ
بالێنت ئِے اَرواہ ءِ چِراگ
آجُوی ءِ دات ئِے نِشۆن
او! گُلزِمین ءِ سَرمَچار
اَچ نۆکپَرَنگێں زالِما
گۆں زۆراکی ءِ زۆر ءَ وَتی
اێرجیگ تَئی سَر کُت نَکُت
باگێں بَلۆچِستاں وَتی
پہ مَکَّہێں مات ءَ وَتی
تَو ھَکّ وَتی شیرمادَر ئے
سَر نَدر کُت ءُ دات ءُ شُت ئے
نَکش اِنت بَلۆچانی دِلاں
کُلّێں دَیار ءُ ھَلکَواں
ھَرچ کَلَّگ ءُ ھَرچ بَندِن ءَ
نام تَئی چۆ شَدر ءُ اَرجَل ءَ
سَردار، پِرامۆش تَو نَبَئے
تَئی زِند بَلۆچی زِندے اَت
مَرگ ءَ تَرا سْرَہمێنت نَکُت
آشۆب ءِ جار اِنت ھَرگوَرا
تَو مَرگ ءَ پَد ھَم زِندَگ ئے
مُدام مُجَّتی ئے ھَرچ دِل ءَ
داں آجُو بَلۆچِستاں بِبیت
داں مِنزِل ءَ ما سَر بِبێں
رَہشۆن اِنت تَئی اَرواہ مئے
ھِچّ پَشت نَکَپت نام ءُ نِشاں
کْوَہنێں پَرَنگانی اِد ءَ
(بلے) گۆکپرۆش ءَ اَنگَت زِندَگ اِنت
میرێں بَلۆچ ھاں گۆں یَلاں
نۆکێں پَرَنگ ھَم گار بَنت
آ، باریگ چَمّاں اَندَر اِنت
مَن گِنداں باندات ءِ تَہا
کۆہلُو ئے کۆہانی شَم ءَ
پہ گێدَرێں بے ل ءُ یَلاں
مانِش اَگبَر ءِ بیت زْیارَتے
مانیت مَجید داں مَہشَر ءَ
<سترُنگ><اِم>اَبدُل مَجید گْوادِری