دۆشی نۆدانی مۆلُماں گْوَرتَگ
دیدَگاں زِرلَمبے رُداں بیتَگ
سێنَگ ءِ رێگِستاں زَراں بیتَگ
کارچ ماں جاڈێں دیدَگاں بیتَگ
دِل مَنی بُڈُّواں وَراں بیتَگ
چَہ دوێں دیدۆکاں رِچاں بیتَگ
تْرَمپ تْرَمپ ءَ ءُ سَمبَراں بیتَگ
کۆہے ءُ کۆہے ءِ سَر ءَ دَمبے
دَمبے ءِ پُشت ءَ بارَگێں مَردے
بارَگێں مَرد ءُ آجِزێں مَردے
آجِزێں مَرد ءَ ساز بالێنتَگ
لاگَرێں مَرد ءَ دِل وَتی مُشتَگ
سَرزِہانی پَدانی اَنگاراں
چَہ نِگاہانی مێتَگ ءِ دَگّ ءَ
زێدے ءَ شَہکَورے تَچاں بیتَگ
بے نَگێں شیر سَر رِچاں بیتَگ
سُورمَگێں سَرتَلّاں شَلاں بیتَگ
نازبُو بَنگانی تَڈاں بیتَگ
گْوات شیراں گِل ءِ مِچاں بیتَگ
دۆشی دْراہێں شَپ ءَ زِر ءِ دێم ءَ
تُنّ کَچکۆلے ءَ گْوَراں بیتَگ
مۆسُم ءَ مِگرازے دَپ ءَ بیتَگ
دْراہێں بالاد ءَ اێر کَپاں بیتَگ
پُلّ ءُ سَرچُوڈ سَر چِناں بیتَگ
<سترُنگ><اِم>تاج بَلۆچ