پُرزِمێرێں دَردے نَبُوتَگ تالِہ ءَ
پیرێں چِنالے ءِ بُن ءَ
اَرماں چۆ تاکاں رِتکَگ اَنت
دَم بُرتَگ نالۆکێں نَلاں
کَسّے اِد ءَ پْرُشتَدِل اِنت
دَمکانی بالاد ءَ
نَمالیت مِہلَبێں دْوایاں وَتی
مَن گۆں وَتی ھۆرکێں دِل ءَ
دِلگۆش اَتاں
دِل چۆ کَپۆتے بے وَس اَت
نہ شَہمے رُستَگ ھُلکَہ ءَ
نَئکِہ چِڈِکّایے بَلِت ماں دیدَگاں
کہ ناگَہاں…
دۆشی کُدُواں نالِتَگ
آتراپ ءِ زێمِر مالِتَگ
دۆشی کُدُواں نالِتَگ
اَدّیرَہاں کِسَّہ کُتَگ
زِند یَکّ ھَنۆشێں مِہلَبے
سُہب ءِ ھَمُک چانٹ ءِ سَر ءَ
پَرّێچیت زُلپ ءَ گْوَپتَگێں
وَہم ءُ گُمَناں بَہر کَنت
شام ءِ تِلاہێں مێتَگ ءَ
کَیپانی جُوے کَنت رَواں
چۆ ماہِکاں…
دۆشی کُدُواں نالِتَگ
اَدّیرَہاں کِسَّہ کُتَگ
نَوبَت گۆں چَولاں چیکُوی
چۆکہ مَلَنگ ءَ سَربَتَگ
مِنزِل جَناں مَستێں مَلارانی سَر ءَ
واب اِنت ءُ آگاہ اِنت بَرے
رۆچ ءَ گۆں رَنگ ءُ جَلوَہاں
کَنت دَست ءِ مُندریک ءَ وَتی
دُرسێں گُناہاں تُلُّسێں
ماں پاگ ءِ پێچاں ماں جَنت
دۆشی کُدُواں نالِتَگ
اَدّیرَہاں کِسَّہ کُتَگ
بیم چۆ رَمێزانی سْرَپے
بے وانکی ءَ شێپ گِپتَگ اَنت
ماں وَہد ءِ بۆگانی شَماں
وَہمانی دَزرۆدێں کِشار
چۆ جَنگَلے ءَ سَبزِتَگ
سُہبانی مِسک ءُ مِہلَبێں
پێژگاہ گْوات ءَ رُپتَگ اَنت
شام ءِ تِلاہێں مێتَگ ءَ
کَیپانی جُو ءَ تَم کُتَگ
دَنزے کہ تالان اِنت سَر ءَ
دَردے کہ پێچان اِنت وَت ءَ
گۆں زِند اِسمێں ھُلکَہ ءِ
دَمکانی دْراج ءُ مارپێچێں لَنکُکاں
نہ شَہمے رُستَگ ھُلکَہ ءَ
نَئکِہ چِڈِکّایے بَلِت ماں دیدَگاں
دۆشی اُدُواں نالِتَگ
اَدّیرَہاں کِسَّہ کُتَگ
<سترُنگ><اِم>مُنیر مۆمِن
(<اِم>یَکّ بِچیلے آزماں)