ھۆن اَرس ءِ بَدَل
سارت اُپّارَگ اِنت
دِل چۆ آس ءَ بُن اِنت
دَرد گْوار اَنت چۆ اَبرِستَگێں جَمبَر ءَ
گَم چۆ بیر ءَ سْرَپ اَنت
بَم چۆ کۆہ ءَ کَپ اَنت
مئے مُرادانی پاکێں جَبین ءِ سَر ءَ
دُور تَہنائی ئے لُنجێں وَیرانَگ ءَ
ماہِکانێں شَپاں
رۆک بَنت ءُ مِر اَنت تْرانَگانی چِراگ
بْرَمش دَنت تَئی زَہیرانی کَندیل ءِ وَٹّ
تَئی ھَیالانی پُلّ زِرد ءِ باگ ءَ سْرَپ اَنت
گیر کاینت مَن ءَ گْوَستَگێں وَہد ءُ پاس
زِرد ءِ سَردَپتَراں
مِہر ءِ کِسَّہ ھَلاس
دِل سُچیت بے کِساس
اُمر ءِ آسَر کئے ءَ زانت اِے رَنگ بیت
دِل چۆ گُمنامێں سَرداری ءَ تَنگ بیت
مِہر اوں پارسَنگ بیت
دۆستی پہ بَہا
اِشک پہ سَنگ بیت
دَہر ءِ بازار ءَ اَگل ءُ دِل ءِ جَنگ بیت
زِندَگی تَنگ بیت
بے تَوارا پْرُش اَنت
واہَگانی کَلات
دِل ھَزار بَہر بیت
زِندَگ ءَ مارا نَیل اَنت جَگَربُرّێں یات
دَم بَر اَنت بے ل ءُ بْرات
چَمّ چۆ کَور ءَ شَل اَنت
گَم چۆ آس ءَ بَل اَنت
دۆست ءُ دُژمِن گَل اَنت
اوہ ئے بے زانَگی!
وائے بے چارَگی!
زار پہ رَد کَپَگ
دِل سُچیت!
دِل سُچیت!
دِل سُچیت بے کِساس
مِہر ءِ کِسَّہ ھَلاس
<سترُنگ><اِم>مُبارِک کازی