دَزگَٹّ آں چَہ سیم ءُ سَناں
نِشتَگ لَیبُو جۆڈ کَناں
مَرچاں اَچ تَو بے ھال آں
مَرچاں گۆں وَت گَپّ کَناں
چَمّ گۆں پاداں دِلتَنگ اَنت
دِل دْرۆہان اِنت گُلبَدَناں
وَہد ءِ پۆڈ ءَ بۆرێناں
دْرَچک ءُ داراں شَیر کَناں
دێر اِنت تَرّ ءُ گَرد نَبیت
دێر اِنت کہ مَن بے وَتَن آں
سَر گِرَگی اِنت، تۆشَگ نێست
مَرگ ءَ وَتی مَن رَہن کَناں
چینچو کَبر بُکۆچاں مَن
دانکہ وَت ءَ را دَر بِجَناں
مۆہ نَبیت کہ تَژناں تَئی
بْیاراں پہ وَت سَر بِکَناں
<سترُنگ><اِم>مُنیر مۆمِن
(<اِم>یَکّ بِچیلے آزماں)