آزماں دَست ءِ دِل ءَ اِنت چۆ زِر ءِ آدێنک ءَ
جَمبَری ساچ نَبَنت، ماہ گْوَز اَنت، سال گْوَز اَنت
سَنٹ شَپرۆلَہێں تالِہ، تَئی اِستال گْوَز اَنت
ساوَڈی نۆد نَشَنز اَنت جَپێں تَلّانی سَر ءَ
تْرَمپُکے اَرس نَگواہیت دِل ءِ وَلّانی سَر ءَ
مۆسُم ءَ آپ نَبَنت تُنَّگێں وَلّانی کِشار
آس ھُشکاوَگێں دْرَچکانی بَدَن تُنّیگ اَنت
ھُشک ءُ گیمُرتَگ اَنت پُلّ مِہلَبێں باگانی گُلاب
سُتکَگ اَنت رۆچ ءِ زَراب ءَ چَہ کَپۆتانی کُدُو
تْرَمپے اَرس ءَ چَہ زِبَہر اَنت مئے گُلێں ھۆٹَگ ءُ جُو
پَہک بے کَیپ اَنت مُرادانی اَبَدمانێں شَراب
بْرَہنَگ اَنت بَلّ ءِ کَہیر، کێچ ءِ چِنالانی وَڈ ءَ
زاپِرانمَہپَرێں کاڈانی جَگَر سارت نَبیت
ھَلک چَمدار کَدی بارێں گِرۆکے شَہمیت
کئێت بَہارگاہ ءِ گُلێں کاڈ گۆں بَشّامی جُڈاں
بُورّ ءُ بَر کار اَنت پَدا مِسکێں رَگامانی سَمَر
مِہر ءِ بَروَرداں چَش اَنت، پَرک نَکَنت گَندَگ ءُ شَرّ
<سترُنگ><اِم>مُبارِک کازی
(<اِم>ھانی مانی ماتێں وَتَن)