کئے ءَ گَم تَرا دات، کئے ءَ دِل تَئی پْرۆشت؟
کئے ءَ زِندمانی ئے واہَگ تَئی پیلّۆشت؟
کئے ءَ دَستاں ماں کُت تَئی گْرانێں سانکَل؟
ھَمبَل کئے ءَ کُت تَئی جیگ تَل تَل؟
تَرا واری ءُ بَزَّگی اِے کئے ءَ دات؟
کئے ءَ چۆش پیسکێنت تَئی مَکَّہێں مات؟
پُشت ءَ کئے ءَ جَت تَئی زانت ءُ زاں؟
کئے ءَ بُرت تَئی چاکَری ٹَہل ءُ شاں؟
کئے ءَ چێر تَرّێنت تَرا ءُ تَئی نام؟
چِہ پَیم ءَ تَو بیت ئے گُلام ءُ مَلام؟
لَگَتمال کَہچَر کئے ءَ تَئی کُت اَنت؟
گۆوال ءُ گۆرُم کُج ءَ تَئی شُت اَنت؟
چی ءَ مَچّ ءُ نیبَگ تَئی گیمُرتَگ اَنت؟
وَلّانی بَر تَئی کئے ءَ سِستَگ اَنت؟
دۆدانی بَدواہ ءُ دُژمِن کئے اِنت؟
نادِلسِر ئے تَو بلے اێمِن کئے اِنت؟
دْراہ ءُ وَداراں کَئی نِشتَگ ءِ؟
باہۆٹ ئے تَہت ءِ چی ءَ وَپتَگ ءِ؟
وَتی ھَلک ءُ مُلک ءَ وَت دَست بِگِر!
گُل ءُ پُلّێں راہ ءَ دُبَر سَر بِگِر!
<سترُنگ><اِم>گُلام ھُسَین شۆہاز