(کاگَدے پہ جُہد ءِ بَیرَکدار شَبیر جاں لَکُّوا)
دْرۆت پُلّ!
گۆں تَو گَپّ کَنَگ گران اِنت، زان ئے چی ءَ ؟ اِے گَپّ ءَ پَدا کَناں، یَبَّرے اِد ءَ کایاں۔
بِگِند ئے تَو مَن ءَ مَزان ئے۔ مَن ھَم تَرا اِے داب ءَ نَزانتَگَت، اگں تَو گۆں دو پَرپَٹ ءُ چار سَنگَت ءَ مَنی گِس ءَ مَیَتکێن ئے۔ تَرا لُمَّہ جاں راہ دَنت، تَو گۆں آیَگ ءَ جُست کن ئے:
“مئے مَردُم کُج اِنت؟”
اَنچۆ تَو دِلپَہک، اَنچۆ دیدَگێں لُمَّہ جان ءُ اَنچۆ لُمَّہ ئے راجی سَنگَت گُلنِسا! بَرے بَرے کِشک تاب وَر اَنت، سَواسانی نییَت ءَ گُڈا پَمێشکا بارێں چُنت لَکُّو، چُنت لُمَّہ ءُ چُنت گُلنِسا یَکّے دُمیگ ءِ وَدار ءُ داتَگێں زُبانانی پَدا داں اَبَد پَشت کَپ اَنت۔ رۆچہ ھما رۆچ نہ لُمَّہ جان اَتک ءُ نہ تَو چَکّے جَت۔
پُلّ! ما کَسّ ءَ تَرا نَزانتَگَت۔ آ رۆچی کہ تَو کا ئے ءُ بَسّ ھَمے گُش ئے:
“مئے مَردُم کُج اِنت، مارا ھَمے گِس ءِ ڈَسّ دَیَگ بُوتَگ۔”
گُلِنسا ھَم نَزانت کہ تَئی مَردُم کئے اِنت، ءُ شُما کُجام دَمَگ ءِ سَنگَت اِت۔ تَرا باز دارَگ ءِ جُہد کَن اَنت بلے پَدا پَدُکّی کَسے کئێت ءُ گۆں شُما ھَلوَت کَنت۔ شُما دَر کَپِت۔ اود ءَ لُمَّہ کہ سَر بیت، گُڈا گُشیت، “اِے جاگَہ آ نَہ اِنت!“
لَکُّو جاں!
شَپ کہ رۆچ بیت گُڈا ھَر شَئے پَدَّر بیت۔ آ مَگرَبی لُڈ ءُ بُڈے اَت کہ شِگوَست۔ وَہد گْوَزیت بلے لَہتے اَنچێں دَماں پَشت کَپیت کہ داں اَبَد مانیت، ءُ وَہد ءِ زۆراک ءُ بے ر ئِےائیں آدێنک ءِ دێم ءَ نام ءُ ھُبّانی اَیب چۆ کۆدِکا لُبّ ءُ سَما بَنت ءُ پَدَّر بَنت، ءُ ھَمے دَماں جاہے گۆں اَنچێں زێبائیں مَردُماں اَنچُش پَشت کَپیت کہ اَبَدماں بیت، لَہتے پہ وَشّی ءُ لَہتے پہ کُہت۔ اِے دَماں بِگِند ئے گۆں تَو چۆ پَشت مَکَپتێں اگں تَئی اَکس گُلنِساءَ سیما ئے دَست ءَ مَدیتێن ءُ تَرا پَجّاہ ئِے مَیاُرتێن ءُ مَگُشتێں:
“ھَسا! اِے چُکّ مَن دیستَگ۔ اِے مئے لۆگ ءَ اَتکَگ بلے…”
لَکُّل!
دُژمِن ءَ تَرا گۆں سَنگَتاں چێر وَ داتَگ بلے شُمئے اَکساں جَہاں سَر ءَ زُرتَگ۔ دۆست ءُ دُژمِن کُلّ شُمارا چۆ گُلنِساءَ شَرّ پَجّاہ کار اَنت۔ شُما آئی ءِ دَست ءَ اِت، بلے شُمئے اَکس کار ءَ اَنت۔ دُنیا ءِ تَہا چُشێں رَہشۆنے دَر نَیَیت کہ پہ راجی جُنزے ءِ تَبلیگ ءَ شُمارا بُگوازێنیت۔ ھَمینچُک کار شُما کُتَگ، دُہَمینچُک شُمئے اَکس کَنَگ ءَ اَنت۔ ھَمینچُک اَزییَت شُما سَگَّگ ءَ اِت، دُہَمینچُک شُمئے اَکس سَگَّگ ءَ اَنت۔ چُشێں رۆچے نێست کہ شُمئے مُدامیێں ھَیرواہ، شُمارا وَتی زِند ءِ مۆل ءُ مُراد جۆڈ کَنۆکێں ماما ءِ گِداں، گۆں شُمئے اَکساں ماں دارَگ نَبیت یا دِرّ ءُ دۆچ کَنَگ نَبیت۔ یَکّے ماما ءُ دۆمی مات ءُ گُہارانی اَرس، ءُ سَیمی شُمئے اَکس! ءُ چَہ اَکساں پێش…
لَکّی!
شَپ اَت۔ تَہاری اَت۔ تَکلیپی اَت۔ سَپَر دَر سَپَر اَت۔ گِلَّہ ءُ زاری اَت۔ شات ءُ گَلی اَت۔ ھَمِشانی نْیام ءَ مَردُم وَتی بَسات ءَ سِٹّ ءُ کَپے کَنَگ ءَ اَت، بَڈّ ءُ سَر اَت، دْرَنگ اَت، تُنّ ءُ گُژن اَت، ءُ چَہ گێشێں تُنّ ءَ شانَگ اَت، گاری اَت بلے مَردُم زِندَگ اَت۔
وَتی تَبد ءُ وَتی گَرم اَت اَنت۔ وَتی کۆہ ءُ دَمَگ اَت اَنت۔ وَتی سِنگ ءُ وَتی پَٹّ اَت اَنت۔ وَتی پُلک ءُ وَتی ڈِگار اَت اَنت۔ ماہِکانی گۆں ٹیٹیاں، بِگاہ گۆں شیرچاہاں، کَور گۆں بُزگَلاں، بُگ گۆں سُہرُواں، مَچکِدَگ گۆں بْرِنج ءُ گَلَّہاں۔ کُلّ اِشت اَنت ءُ وَت ءَ دیر کُت۔ نِزۆری گُش ئے یا چَہ وَت ءَ گێشێں بار ءَ چێر تَرَّگ؟
اِنّاں، اِے دوێں نَہ اَت اَنت، تُرس اَت۔ نَزاناں! بلے گِنداں کہ کَسّ نَگِنداں۔ رۆچ ءِ ھما دیری ءَ مَردُم پَہک ھُژگُم بیت۔ بَسّ یَکّ اوستے، اُمێتے، بَرۆسَہے پَشت کَپتَگ۔ ھَمے مارا دْرُستاں واتَرّێنت کَنت، ءُ واتَرّێنیت ھَم۔ مئے دْرُستانی اُمێت بَسّ شُمئے ھِمَّت اِنت۔ اِے راجی جُنز ءِ تَہا شَہیداں پَد آ کار ءَ کہ تَو، گۆں رَہشۆنێں دین جان ءُ زاکِر جان ءَ ھَوار ھما کُلّێں بَندیگاں کہ پہ وَتی سَرڈِگار ءُ وَتی پَدرێچ ءِ دَر جَنَگ ءُ رَکّێنگا چَہ چَماں اَندێم اِت ءُ کَنَگ ءَ اَت، آ کار ءَ دِگِہ کَسّ کُت نَکَنت۔ شُمئے ھِمَّت، شُمئے جُرَّت، شُمئے جُہدانی بَروَرد اِنت کہ بَلۆچ ءِ راجی جُنز ءِ تَوار ماں جَہان ءَ جَکسان اِنت۔
شُما اِے جُہد ءِ ھَکّێگێں جَہگیر اِت، سَپیر اِت۔ آ کار ءَ کہ شُمئے اَکس ءُ پہ شُما تَوار چِست کَنۆکێں سیم ءَ ، زَرینَہ، سَمّی ءُ زاکِر جان ءِ ماس ءَ ھَوار گۆدی ءِ کارَواں کَنَگ ءَ اِنت دِگِہ کَسّی کار نَہ اِنت۔ اِے جُہد ءِ بَیرَکدار شُما اِت ءُ بَسّ شُما اِت۔
شُما بَئی بَلاہێں اُستاد اَتِت۔ وَت بے گْواہ بیت ئے بلے سَرجَمێں کار وَتی کۆپَگاں زُرت اَنت۔ شُما اِے کِسَّہ ءِ ھما کارِست اِت کہ گۆں کِسَّہ ءِ اێر کَپَگ ءَ کِسَّکار چۆ بازێںے ءَ بَہ ءُ بَکَّڈ کُتَگ۔ آ سَربَتَگ اِنت، نَزانت کہ چۆن بِکَناں کہ شُمئے وَڈ ءَ شُمئے اَکس ھَم چێر دَیَگ بِبَنت۔ بَرے ھُنِرے سازیت پہ ماما ءِ گِدان ءِ ڈُرێنَگ ءَ ءُ شُمئے اَکسانی دِرَّگ ءَ بلے نہ ماما دَم بارت پہ گِدان ءِ بَندَگ ءُ شُمئے اَکسانی ٹَنگَگ ءَ، نہ سیم ءَ بَسّ کَن اَنت اَرسانی گْوارَگ ءَ۔
شُمئے اَکساں ھَمینچُک کیمَت آُرتَگ کہ دُژمِن ءَ ھَوار نادانێں دۆست ءُ جَنگی نَپگیرێں بَلۆچ ھَم شُمئے اَکسانی سَودا ءَ ماں جَہانی اِدارَہانی دێم ءَ ءُ ماں رَساندَر ءِ نْیادی ءَ جَنَگ ءَ اَنت۔ کَسے ءَ وَت ءَ مات ءَ کُتَگ، کَسے ءَ پِت ءَ ۔
رَنگ رَنگێں سَوداگِر چۆ ڈُونڈواراں ھَمے اَکسانی سْراپ ءَ اَنت بلے اَکس اَنت کہ دْرُستاں پاشک کَنان اَنت۔ چے سَوداگِر، چے چانُوگِر، چے چُلۆپَکار، کُلّانی پَتَّر گْوات ءَ گۆن اِنت، شُمئے پَہک ءُ پَلگارێں جُہد ءُ وَژنامی ئے دێم ءَ ۔
پَمِشکا مَن گُشت کہ گۆں تَو گَپّ کَنَگ سَکّ گران اِنت۔ گۆں تَو گَپّ کَنَگ ءَ اِیماندار بَیَگ لۆٹیت۔ ھَیر! دُژمِن بیت کہ دُژمِن ءُ نادانێں دۆزواہ، کُلّ شُمئے جُہدانی دێم ءَ ھَلاس اَنت۔
پُلّ! مَن کہ مَشکَت ءَ اَتاں، چَہ شُمئے چێرێں زِندان ءَ آجُو بیتَگێں بَلۆچے ءَ مَن ڈیکّ دات۔ اِے بَزَّگ شَمس ءِ دیوان ءَ اَتکَگێں داکتَر بَلۆچ ءِ رَنگێں زَنڈێں وانێندَگے نَہ اَت کہ زُبان ئِے چَرپ کُتێن ءُ بُگُشتێن ئِے، چۆکہ مَن زاناں، دِگِہ کَسّ نَزانت ءُ زُبان ئِے چَہر داتێں، ھَزار بے بَلاہ تَئی مَرگ ءِ دْرۆگێں ھال ئِے بِداتێں۔ مَن رَپیک اومان ءِ جُست کُت گُشت ئِے مَن نَدیستَگ بلے تَئی نام ئِے گِپت۔
تُوری ھَرکَس بُگۆشیت، اَکس کَدی مُرت کَن اَنت؟ کَرن پِر گْوَز اَنت بلے اَکس مان اَنت۔ اِے اَنچائیں اَکس نَہ اَنت۔ چَہ کَہۆلاں بالاتِر، سَرجَمێں راجے ءِ اَرماں، وَشّی، وَژدِلی ءُ آجُوی گۆں شُمئے ھَمے زِندَگێں اَکساں، ھَبَر کَنۆکێں اَکساں، گُشتانک دَیۆکێں اَکساں بَندۆک اِنت۔
مُدام ھَست باتِت۔ دْوا اِنت کہ گۆں وَتی اَکساں آجُو باتِت۔ وَتی کَہۆلانی پَجّیا آجُوی ءِ مُراداں بِگِنداتِت۔
تَرا نَدیستَگێں مَردُم،
<سترُنگ><اِم>ھَسا بِجّار
(چَہ پَنَہگیرانی بُنجُلے ءَ - 5 مارچ 2025)