مِہر ءِ شانے تَرا چِنان ءُ دَیاں
دۆدمانے تَرا چِنان ءُ دَیاں
تَو کہ ھَمراہ ئے زِمین ءِ کِشکاں
آزمانے تَرا چِنان ءُ دَیاں
ماہ ءُ اِستال تَئی چَمّاں وَپس اَنت
سُورمَدانے تَرا چِنان ءُ دَیاں
وَہد وَپتَگ سَگار ءِ ساچان ءَ
بْیا کَمانے تَرا چِنان ءُ دَیاں
بِلّ چۆ اَرس ءَ تَئی کُٹّ ءَ بِرِچاں
تَئی نِشانے تَرا چِنان ءُ دَیاں
بُو کَپۆتے ءُ دِل ءِ بَست ءَ بْیا
بُوچ ءُ دانے تَرا چِنان ءُ دَیاں
تَو مَنی پاداں کِشک پێڈات اَنت
مَن گِدانے تَرا چِنان ءُ دَیاں
پَرچا ٹَہلانی تِلاہاں رێچ ءِ
نُگرَدانے تَرا چِنان ءُ دَیاں
بِلّ ئِے پۆشیت مُنیر مئے اَہداں
بْیا زُبانے تَرا چِنان ءُ دَیاں
<سترُنگ><اِم>مُنیر مۆمِن
(<اِم>یَکّ بِچیلے آزماں)