بْرَمشے دێوانَگێں چارّاہ ءَ ھَتَم رۆدێنیت
تَرّیت اَرواہ ءِ وَتی گارێں کِلیتاں پۆلیت
کَندَگ ءُ اَرساں ماں یَکّ تاسے ءَ مێنَگ لۆٹیت
رۆچے رۆچے وَ مَن ءَ دَرد ءِ تَلَب کَندێنیت
اَچ مَن ءَ دُور بِبیت، گْوات ءِ مُکاماں دُزّیت
کئێت نَزُّوکا تَ اوتاگے چَہ آس ءَ کَشّیت
اوست ھَنکێنێں گَنۆکے تَئی گْیاباں نَسیب
اَنگَرێں کُوکُواں زُوریت، ءُ گِدانے سازیت
زێمِرێنیت وَتی پادینکان ءُ جَمبَر گْوار اَنت
آ مَنی دْراہی ءَ کَورے ءِ وَڈ ءَ مَٹّا ایت
مئے گَنۆکی اِنت ھما ءُ مئے سار ءِ سار ھما
چَمّ ءِ کَرکێنک ءِ تَہا مِہلَبێں سَنجاں مێنیت
اِنشَپی نۆدے بِشَنزیت، دْرَہێں دیدَگ بُڈّ اَنت
اِنشَپی آسے بُجُنزیت، دِلاں پێڈا ایت
چێبَری واہَگ ءِ میتاپ ءَ مَن اَنگَر کِشتَگ
تُنّ وَتی بے نَگێں شێنکاں مَنی لُنٹاں مالیت
اَنچێں شَہمے مُنیر گْیابان ءَ رَجیت بازارے
اَنچێں بِچکَندے کَلاتانی دِلاں تَرّێنیت
<سترُنگ><اِم>مُنیر مۆمِن
(<اِم>یَکّ بِچیلے آزماں)