جامَگ ءِ زِنچِک، سَریگ ءُ شال ھۆنێن اَنت مَنی
میری پاگ ءُ مَنگِہێں دَزمال ھۆنێن اَنت مَنی
مَہشَرێں کْوَیٹَہ مَرۆچی کَربَلا اِنت، کَربَلا
پہ بَہارگاہی جُڈے، ڈُکّال ھۆنێن اَنت مَنی
بے وَسی گِرّان آں مَرچی کہ سَڈَکّانی سَر ءَ
بانزُل اَنت ٹَپّی، شِکَستێں بال ھۆنێن اَنت مَنی
شَپچِراگے ئے، بِبَل آشۆبہینارێں شَپاں
ماہ ھۆناں میچَل اِنت، اِستال ھۆنێن اَنت مَنی
کُنگُرێں بَچّانی ھۆناں جانشۆد اِنت گُلزِمین
ھِنّیێں سِتکانی شِرک ءُ پال ھۆنێن اَنت مَنی
چۆنێں بے چَہر ءُ شُبێنێں لَچَّہے اِے زِندَگی
شَیر چۆ اَرس ءَ ھُلُکّ اَنت، گال ھۆنێن اَنت مَنی
بے نِشان ءُ ڈَسّێں کَبرے ءِ تَہا مَن نِشتَگاں
گِزدَپیگ ءُ گِس، دَر ءُ دیوال ھۆنێن اَنت مَنی
یَکّێں تیر ءَ ما ءُ آجِز ٹَپّ ءُ ٹۆری بُوتَگێں
یَکّێں کَٹار ءَ گُہار ءُ زال ھۆنێن اَنت مَنی
<سترُنگ><اِم>مَجید آجِز