مَن ماہێں ماہِکان ءُ ماہزێب آں
وَتی دێمۆنیاں پہ بْراہ زێب آں
ما زِند ءِ مَتلَب ءُ مانا نَزانتَگ
دَیاں دَردے تَرا جان ءَ نَزانتَگ
پہ نَپت ءُ بیر ءُ گۆں دُمبال کا ئے
پہ بالگَرد ءُ گُراب رَند ءَ مئے ساہ ءِ
تَماہ ءُ تِبلُکێں داباں پُل ءِ مئے
نَدیدێں دُتُّکی واباں پُل ءِ مئے
چۆ زَہر ءَ تَئی رَگ ءُ جان ءَ رِچاں ما
پہ آجُوێں واتَن شَہم ءَ تْرِپاں ما
چۆ گْواڈَک سْرَپتَگێں ھاک ءَ تِجاں ما
چِراگ ءِ لیلۆاں تْراکێنت تَئی دِل
تَو آس دات گْوانزَگے چَمجَہلێں کاتِل
گۆں بَمب ءُ اَیٹَمان اَتک ئے سَرین ءِ
تَرا رُزوا شَرَپ نہ شَرم ءُ دین ءِ
تَو دْرِکّاں بابَر ءِ ھامۆش کن ئے چۆن
چَہ کَٹّاں ھانُل ئِے پِرامۆش کن ئے چۆن
اِے گَنجاں کہ وَتاں پہ گَنج بَکش اَنت
سِلاہاں نۆک کَنانا سَنج بَکش اَنت
داپ ئے تام ءَ وَتیگ ءَ شَرّ چَش ئے تَو
مئے واب ءَ وَپتَگێں تِبلاں کُش ئے تَو
نی اَنگاراں بَئے ءُ جَل جُش ءِ تَو
مَنِ نَجماہ مَڈاہ ءِ پَہر ءُ شاں آں
پہ بْراتاں دْرۆت چۆ اِنجیر تْراناں
وَپا ءِ مَکتَب ءَ چُنت کَرن ماناں
مَن بْراتی دَرد ءَ چۆ آیات واناں
مَن مِہراں مَنتَگاں داں اَہد ماناں
پَرہاد ئے داِمی مِہر ءِ زُباں آں
مَنی مِہرانی ھَنکێں سَبز بیت اِنت
بَلۆچی گُشتِن ءُ ھَر لَبز بیت اِنت
اِے نَپت ءُ بیر پَدی نَیا اَنت، نَترَکّ اَنت
مَن جَزم آں سُہرچیلّ ءُ تَسپ رَکّ اَنت
تَئی ساہ ءُ نَپَس داں اێر بُبُکّ اَنت
پہ گُلرَنگێں وَتی ناز ءِ بَہِشت ءَ
مَنی دۆست ءَ پہ وَت ھِچّی نَِشتَگ
مَن ھَست ءُ نێست پہ اِے ھاک کِشتَگ
وَپا داستاں اَنچُش نِبِشتَگ
کہ شێرزالے اگں چۆ شازیَہا بیت
تَ مِہر ءِ دَرس دِگِہ اَندازے ءَ بیت
زَمانَگ سَمبَہیت ءُ سازے ءَ بیت
وَتاں زێبایاں گۆں نازے ءَ بیت
ما ھَیشێں سَر وَتی باندات ءَ دات اَنت
شَہیدێں ھالَواں پَہریگ مات اَنت
تَباہی پہ تَئی کۆٹ ءُ کَلاتاں
<سترُنگ><اِم>واہَگ نْیاد