تَنگی ءِ ساہَت ءَ
جَنگ ءِ زَگرێں پِڈ ءَ
ھۆن ءُ ھۆنرێچ بیت
گار ءُ بے گْواہی ءَ
لَٹّ ءُ شاپ وَہدے بیت
دْرُست بَدَل بَنت رَو اَنت
چَمّاں جَہل کَن اَنت
گۆشاں پُکّی دَ اَنت
ھَکّ ءِ گَپّے نَبیت
مَردُمدۆستی ھَلاس
دین ءِ دیندار گُنگ بَنت
یا گۆں زۆراوَر ءَ
ھَمزُباں بَنت وَتی
نِند اَنت یَپَتَّرا
پَہر ءُ شاں پہ گُش اَنت
کُشت ءُ کۆشی کَنِت
کاپِر اَنت زالِم اَنت
گَپّ ءَ سَرپَد نَبَنت
چَمّاں پَچ کَن بَلۆچ
رَد مَوَر، رَد مَکَپ
گَپّ ھُدا ءِ نَبیت
بیم ءُ تُرسے کَپیت
زۆر ءُ زۆراوَر ءِ
جَنگ ءِ زَگرێں پِڈ ءَ
لۆگاں آسے کَپیت
وا ءُ زارے رُدیت
اِمرۆز ھَر نێمَگ ءَ
مَہشَرے بیت پہ تَو
کَسّ تَئی جُست ءَ نَکَنت
کَسّ تَئی ھال ءَ نَگیپت
کَسّ تَئی دَردوار نَبیت
نئے پہ تَو کئێت کَسے
کُہت ءُ اَرماں بیت
جۆن کَپ اَنت رَہسَراں
رَستَرانی وَڈ ءَ
جَنگ ءِ زَگرێں پِڈ ءَ
سَکّیاں گۆں بَنت
جِند ءِ بْرات ءُ گُہار
دۆست ءُ سَنگَت وَتی
ھَمدِل ءُ ھَمہَیال
زَہگ ءُ وَرنا ءُ زال
نوں مَکَن وَہد زَوال
یَل کَن کۆردیدیا
دْرِکّ پہ دْرِکّا بْیا
جَنگ ءِ زَگرێں پِڈ ءَ
<سترُنگ><اِم>داد شاشانی