(1)
اِے تَہارێں شَپ مَنی بینائیں دَرد ءِ ھَمبَلۆ
پَرچا بَندیت بانزُلاں
اِے کِشک ءُ دَر گیمُرتَگێں
پہ شَہمی تْرَمپے، پہ چِڈِکّائی بُلۆرێں ٹُکُّرے
چَہ آزمان ءِ سَبزُکێں دَریا ءَ آدێم رَپتَگ اَنت
بْیا مَنی بینائیں دَرد ءِ ھَمبَلۆ
بْیا مَن ءَ چۆ سِنگُکے
دَست ءَ کَن، آپ ءَ دَور دَئے
بَلکێں رُدیت بْرَمشے، ءُ شَہمے رۆک بیت
تَو اێوک ئے، مَن اێوک آں
ءُ اێوک اِنت اِے وَہد چۆ وَیرانَگ ءِ
تَہنائیں یَکّ مَچّی بُنے
(2)
دِل ءَ وَ باز لۆٹِتَگ
وَتی زَمانَگ ءِ شَپ ءَ را چَمّ پِر کَناں بلے
وَتی تَہا کہ سَر جَتَگ
ھَزار کِشک کَبر اَت اَنت
ھَزار رَند ءَ گۆں وَت ءَ
مَن ڈیک وارت ءُ کَپتَگاں
پَدا گۆں دَستمۆشیاں
وَت ءَ را دیست مَن
تَئی رَنگ ءُ زێب ءِ دَرگَہا
تَرا گۆں ھَلوَت ءَ اَتاں
"اِے شیشَگاں بُزُور ءُ
کَمّێں نُور ماں بِکَن بِدئے"
(3)
کَسانُکێں چِڈِکَّہے نَبُوت
چَہ جِنگُل ءَ سُبَکتِر اِنت
واب وَہدے بال کَنت
تَ دیدَگاں سَما نَبیت
نہ چِراگ چَکّ جَن اَنت
نہ سَرجَہ ءَ چَہ ھَلوَتے رُدیت
کَسانُکێں چِڈِکَّہے نَبُوت
مَن جێڈَگ ءَ اَتاں
مُرگ دْرَچکانی کہ اَرمان اَنت
پَچے بال کَن اَنت
ھۆرکێں چَمّانی کُدُوانی دَراں بَند کَناں
سَر جَناں وَپتَگێں دَمکانی تَہا
شَپ وَتی مَہپَراں پێچان ءَ مَنی دێم ءَ گْوَزیت
(4)
اِے تَہاری زِرے
چَمّ گُش ئے راچِن اَنت
پُلّ ءُ اِستینێں چادِر تَئی
دْرَپشَگ ءَ اِنت مَنی
بے وَتێں اێوکی ءِ زِر ءَ
چۆکہ آچارے ءَ
بْیا مَنی دیدَگاں
شار ءِ لَمب ءَ بِبَند
ءُ بِبَر گۆں وَت ءَ
یا زِر ءِ سێنَگ ءَ
چۆ چِراگ ءَ بِبَل
ماہ ءِ پَیم ءَ بِچَم
(5)
پُر ھَرید اِنت
مَنی گْیابان ءِ کَپۆتانا بُگُش
بَلکێں نُو سُتکَگێں سێنَگ
اوں نِہادے کار اَنت
بَلکێں بُن گِپتَگێں پِریات اوں
کار ءَ بْیا اَنت
مَنی گْیابان ءِ کَپۆتانا بُگُش
جَنَّت ءُ باگێں کُدُواں
وَتی چَمّانی تَہا چێر دَیِت
(6)
ھَمسَپَر، اِے تَو ئے
یا تَئی اوست ءِ شَپ اِنت
چۆ تَہارێں زِر ءَ
چَول جَنت دیدَگاں
شِنگ اِنت ھَر نێمَگ ءَ
چۆکہ گْیاباںے ءَ
ھَمسَپَر، بْیا دَریگاں بُپۆش
داں مَچاراں کَسّ ءَ
ھَمسَپَر، بْیا مَنی دیدَگاں داگ دَئے
داں مَگِنداں وَت ءَ
(7)
چۆ پێچدارێں دَمکے ءِ نَسیب ءَ شَپ
کہ تاب وارت ءُ گار بیت وَتی تَہا
اگں اِے آزماں آگَہ اِنت
گُڈا بُگُش کہ بْرَمشے، تْرَمپے دێم دَئے
دِل ءُ نِگاہ چۆرَہ اَنت
ھَمے دَمان ءَ ٹیٹیے تَوار کَنت
چۆ آس ءِ دْرَچک ءُ آپ ءِ رۆشنائی ءَ
مَنی تَہا رُدیت
رِچیت، پْرُشیت ءُ گار بیت
مَن بْرَمشے آں، مَن تْرَمپے آں
تَوارے آں، ءُ آسے آں
بلے شَپ اِنت
ءُ پێچدارێں دَمکے ھَر پَدَگ
کہ اێر رَوت تَہاری ءَ
<سترُنگ><اِم>مُنیر مۆمِن