وَتی بُرواناں مُروارِد سُرێنیت
دِگِہ سازے دِل ءِ ٹَپّاں کُدێنیت
تَئی اِے پَرپُکێں لُنٹانی گَرمی
مَن ءَ چَہ مَلکَمیت ءَ ھَم زِہێنیت
چُشێں بَہتے کُج ءَ بْیاراں کہ پہ مَن
اَمُل جاں شَکَّل ءُ شیراں بِمێنیت
گُل ءِ آبرێشُمێں دَست ءِ سَمارے
مَنی شۆر گِپتَگێں زِرد ءَ تْرَہێنیت
دَپی جُست ئِے نَکَنت اَنُّون مَن ءَ را
بلے مَن کہ مِراں، اَرساں شَلێنیت
اَگاں گُل بْیَیت مُلا ءِ بَہِشت ءَ
مَن زاناں جَنَّتی ھُوراں گُڈێنیت
اَمُلّ! یَکّ زَہرکَنِکّێں چِراگے تَئی
دِل ءِ پاد اَتکَگێں بَہت ءَ نَسێنیت
زِیات کَنت اِنت زَہیراں ھانُلَیگاں
اَگاں لال ءِ وَت ءَ را سَمبَہێنیت
دِل ءَ مِہر اِنت مَن ھَرجاہے کہ نِنداں
وَت ءَ کْرام ءُ کِہێباں گۆں رَسێنیت
گُن پُلّێں کَندَگاں ٹَپّاں دَوا کَنت
چَہ آسکی دیدَگاں تیراں شِپێنیت
سَیَد اَنُّون کِہێبانی پَری رَوت
تَئی دیوان ءِ نِندۆکاں زَرێنیت
<سترُنگ><اِم>سَیَد ھاشُمی
(<اِم>تُربَت، کێچ 13-02-1955)