بَرے یَکّ ھاجَتے سایاں، بَرے نۆکێں گَمے مێناں
مَن ءَ دَرماں بِرێپێنیت، ءُ دَردے مَن بِرێپێناں
سَگارے، مَرکَبے، کَبرے، نہ داوا، نہ گُبارے ھَست
کئے اِنت اَنگَت سُرێناں کَنت، مَندیلاں نِگارێناں
ھَیالانی دَمَگ سَبز اِنت، ءُ وَہمانی رَمَگ تالاں
زِمین چۆ آزمان ءَ اِنت، ءُ دَرداں شێنک چارێناں
اِے دِل، اِے مِہلَبێں رَنگانی اَدّیرَہ سَلامَت بات
اگں مۆسُم بِمَٹّیت، مَن دِگِہ نیمۆنے بادێناں
کُجام کِشک ءَ آ واتَرّیت، کُجام ھَنکێن ءَ مِنزِل کَنت
دَمے پێسَر بْیَتکێناں، یا سَہتے پَشت بِکَپتێناں
تَئی اوست ءِ تاہَت ءِ سِتک ءَ بَہِشتے سازِتَگ پہ مَن
نِگاہ چۆ سُجدَگ ءَ دْرَتک اَنت، دَریگاں بے نُمازێناں
ھما اَرمان ءَ رُشنا کَن، ھما کْوَہنێں دِل ءَ بالێں
اِے شَپ داں مِنزِلے بُرتَگ، چِراگاں نۆکگامێناں
مُنیر شَیدائیں مُرگان ءَ مَنی ھَلک ءِ اَمانَت گۆں
ھَتَم ماں بانزُلاں پێتکَگ، کَپۆتاں دِلگیابێناں
<سترُنگ><اِم>مُنیر مۆمِن
(<اِم>یَکّ بِچیلے آزماں)