مَن نازُرکێں ھَیالے ءِ واہُند اَتاں، بلے چاگِرد ءَ مَن ءَ اَنچُش کُت کہ مَن وَتی نازُرکێں ھَیال زُرت ءُ زِمین ءَ کَلّ کُت، ءُ ھَرّۆچ ھَمے جاگَہ ءَ مَن اَرس رێتک۔
مَنی نازُرکێں ھَیال رُست ءُ نِہالے بُوت۔ اِے نِہال مَن گۆں اَرساں رۆدێنت۔ نِہال رُداں بُوت ءُ سَولێں دْرَچکے بُوت۔ دْرَچک ءِ ساہِگ سَکّ وَشّ ءُ سارت اَت۔ اِے دْرَچک ءِ چێر ئے نِندَگ ءَ گُش ئے مَنی اَرواہ ءَ تاہیر رَسِت۔ مَنی کَندَگ ءُ گْرێوَگ، گَپّ ءُ دیواں گۆں ھَمے دْرَچک ءَ اَت اَنت۔ مَن ءَ اَنچۆ گُماں بُوت کہ دْرَچک مَن ءَ سَرپَد بَیَگ ءَ اِنت ءُ مَنی گَپّاں پَہمَگ ءَ اِنت۔ مَن وَتی ھَرچ ھَیالے دْرَچک ءِ شاہانی سَر ءَ نِبیساں کُت۔ ھَرّۆچ یَکّ دَردے مَن نِبِشتَہ کُت۔ دْرَچک ءَ پہ گَلے مَنی دَرد وَتیگ کُت اَنت ءُ رُداں بُوت۔ دْرَچک گۆں مَن سَکّ مِہروان اَت، پَمِشکا مَن دْرَچک ءِ نام کُتَگَت “مِہرواں”۔
دْرَچک سَکّ بَز اَت ءُ پْراہ ءُ شاہِگان اَت۔ ھَر سَباہ شانتُل ءُ کَپۆت دْرَچک ءِ سَر ءَ گۆں وَشّێں تَوار ءَ کُوکُو کَنَگ ءَ اَت اَنت۔ دْرَچک وَڈ وَڈێں مُرگانی ھَنکێن اَت۔ دْرَچک ءِ تَہ ءُ تۆک چَہ مُرگی کُدُو ءَ پُرّ اَت۔ اِے مُرگ مَن ءَ چۆ ساہ ءَ دۆست اَت اَنت۔ بے نَمَگِسکاں اِے دْرَچک ءِ سَر ءَ بے نَگ بَستَگَت۔ دْرَچک پُورَہ بازارے اَت۔ مَن ءَ اِے دْرَچک اَنچۆ دۆست اَت کہ مَن وَتی تَرّ ءُ تاب، ڈَنّ ءِ دَر آیَگ دْرُست یَل کُتَگَت اَنت۔ زِمِستان ءَ اِے دْرَچک مَنی گۆریچ ءِ پَناہ اَت ءُ گَرماگ ءَ لِوار ءِ۔ دْرَچک ءَ ھَم اَنچۆ گۆں مَن آدَت کُتَگَت کہ بے مَن ءَ ، پہ مَنی چَمّاں، گُش ئے مُلُور اَت۔ مَن پَمِشکا دْرَچک تَہنا نَکُت۔
وَہد ھَمے وَڈ ءَ گْوَزان اَت۔ زِندَگی گُش ئے تَچان اَت ءُ دْرَچک رۆچ پہ رۆچ بُرز رَوان اَت۔
مُدَّتے گْوَست۔ دْرَچک سَکّ بُرز شُت، اَنچۆ بُرز کہ دْرَچک ءِ ساہِگ جَہل ءَ نَیَتک۔ دْرَچک ءِ تاک چَہ مَن دیر بیت اَنت۔ گۆں دْرَچک ءِ بُرز رَوَگ ءَ دْرَچک ءِ ساہِگ شُت ءُ مَن ءَ رۆچ ءَ گِپت۔ مَن دْرَچک ءِ شاہ ءُ لَمباں نَرَسِتاں۔ مَنی نِبِشتَگێں ھَیال چَہ مَن ءَ سَکّ دیر شُت اَنت ءُ مَن دُبَر پَدا دْرَچک ءِ شاہانی سَر ءَ ھِچّ نِبِشتَہ کُت نَکُت۔ مَنی زِمِستاں سَکّ سارت بیت اَنت ءُ گَرماگ ءِ لِواراں مَن ءَ سۆتک۔ کَپۆت ءُ شانتُلانی کُوکُو مَن چَہ دیر ءَ ھَم نَِشکُت اَنت۔
پَدا مَن وَتی تْرانَگ بُرزێں دْرَچک ءِ بُن ءَ کَلّ کُت اَنت۔
<سترُنگ><اِم>ھانُل نۆکاپ