زَمانَگ ءَ را تَئی زێبایا گُشَگ لۆٹاں
مَن ماہے آں، نہ چێراگے بلے بَلَگ لۆٹاں
ھَمے دَمان ءَ ھَتَم کئێت ءُ بیت مَنی مِہماں
ھَمے کہ اَچ وَت ءَ ڈَنّ ءَ مَن دَر کَپَگ لۆٹاں
تَئی گَم ءَ گۆں مَنی جِند ھَم شَریک نَہ اِنت
تَئی زَہیر ءَ مَن اَچ وَت اوں پَچ گِرَگ لۆٹاں
مَن سِستَگاں چَہ وَتی مَیم ءَ ، مُہرَگ ءِ پَیم ءَ
تَئی اَنارک ءِ سَر ءِ اَرسے آں، بَدَگ لۆٹاں
اَبَید اَچ تَئی رَنگ ءَ دِگِہ مَمانیت ھِچّ
وَتی مَن اَہد ءَ ھما گێچِن ءَ کَنَگ لۆٹاں
دَمانے پہ مَن ءَ اَتک ئے، زَر اَنت دِل ءُ دُنیا
اِے رۆچ ءَ کاپَر ءِ جَمکے ءَ ماں جَنَگ لۆٹاں
مَن زِندَگ آں کہ تَئی گْواہی ءَ بِدَنت کَسے
مَن نِشتَگاں، تَئی کُلۆہے وَت ءَ دَیَگ لۆٹاں
<سترُنگ><اِم>مُنیر مۆمِن
(یَکّ بِچیلے آزماں)