اَہد ءَ نِشتَگاں کَرنانی
اَرسُن رِتکَگ اَنت چَمّانی
ناں تَئی کاگَدے پہ مَن کئێت
ناں تَئی کاسِدے پہ مَن کئێت
گْوات ءَ گۆں نَبَنت تَئی دْرَہبات
وَژبُو ءُ زَبادێں سَوگات
زاناں چَہ مَن ءَ بے ھال ئے
سِچکانێں تَگِرد ءُ پاتاں
جۆڈێنت اَنت مُلُوکێں ماتاں
بے تاکێں کَلێراں دَشت ءِ
لۆٹیت دِل پَنێراں دَشت ءِ
نَنگار ءُ جُگ ءُ کایگِر
زێبا اَنت ڈَلۆک ءُ جِنتِر
گار اَنت آ بَلۆچی دیواں
گَپّ ءُ کَندَگ ءُ پُلّێں تراں
زاناں چَہ مَن ءَ بے ھال ئے
گَزّ ءُ سُہرُو ءُ پَرماشاں
میتاپ ءُ بَہاری گْواشاں
سۆرِچک ءُ تَباہِگ مێشی
دۆگ ءُ مَستَگاں گامێشی
زێبدار اَنت شَگَزّ گۆں شَنکاں
بْیا مئے چارَگ ءَ تَو گَم کَن
زَہیراں تَئی گَنۆکی زُرتَگ
ھۆش ءَ چَہ مَن ءَ دَر کُرتَگ
زاناں چَہ مَن ءَ بے ھال ئے
سارتێں چَمَّگ ءُ کانیگاں
دِہکان ءُ شِپانک پانیگاں
ھِرّ ءُ ڈاچیانی دَنزَگ
بَشّی کۆکِرانی شَنزَگ
اومان اَنت مَن ءَ کَندَگ تَئی
مِسکێں مَہپَر ءِ رَندَگ تَئی
سُہرُوی پُگ ءُ جۆہاناں
ھَر شَپ تَئی گَم ءِ دێمپاں آں
زاناں چَہ مَن ءَ بے ھال ئے
اومان اَنت مَن ءَ دَشت ءِ پُلک
بے تَو وَشّ نَبیت اِنت دَرمُلک
مَشک ءُ ھینزَکاں گۆں دێزاں
شِمش ءُ ھالَکُو ءُ شێزاں
گالاں اَکتَر آں سازێناں
اِگبال ءُ شَریپ نازێناں
بُرز ءُ بانڈُمێں کاداناں
نِشتَگ اێوک ءُ ھَیراں آں
زاناں چَہ مَن ءَ بے ھال ئے
<سترُنگ><اِم>اَکتَر مَہمُود