چَہ گُل ءِ مُلک ءَ بے سَر ءُ سامان ءَ شُتاں
اِے دِل ءِ گَموار اَت، گَم ءَ ساٹانا شُتاں
گۆں گَنۆک ءُ دێوانَگ ءُ شَیدائیں سَر ءَ
گْرێشَگ ءُ کۆہ ءُ کَنڈَگاں دِرّانا شُتاں
دُژمِنێں دۆست ءَ گْوانک جَتَت، شَرّ یات اِنت مَن ءَ
چَہ وَت ءَ بْرات ءُ ھَمبَلاں سِندان ءَ شُتاں
دِلبَر ءِ ناتُرسێں دِل ءِ واہِشت ءِ پَدا
رۆچے سَد رَند ءَ گۆں دِل ءِ اَرمان ءَ شُتاں
گۆں جَنان اَت گَم، تیرکُو ءُ سیکارچاں مَن ءَ
ھۆن مُرادانی رَہسَراں رێچانا شُتاں
پێش نَداشت گۆناب ھَنُلا سَکّ دَرد اِنت مَن ءَ
گْرێتَگێں چَمّے چَہ گُل ءِ دیوان ءَ شُتاں
مِنزِلاں دۆستی ءِ چَہ مَن ساری کَپتَگێں
ھَر گَم ءِ بارے کۆپَگاں زُورانا شُتاں
اِشکُتَت نادۆست اِنت گُل ءَ پُلّانی بَہار
باگچَہ ءُ پُلّ ءُ سَبزَگاں سۆچانا شُتاں
یَکبَرے گْوات ءَ آ زَبادبُو ئے بُو کُتَت
مُدَّتے شۆہاز ءَ گُل ءِ پْرۆشانا شُتاں
دۆشی مَن اِستاراں جَڈَکّۆکێناں گْوَش ئے
پہ تَئی شار ءُ پیلَوا سِندان ءَ شُتاں
واد ءُ سۆچاکی کێگَد ءِ یات ءِ ھاتِر ءَ
آزَگێں ٹَپّانی سَر ءَ دْرَنزانا شُتاں
اَتکاں گۆں وَشّ ءُ وَژدِلێں اُمّێتاں سَیَد
اَنگَراں لێٹان ءُ جَگَر بْرێجان ءَ شُتاں
<سترُنگ><اِم>سَیَد ھاشُمی
<اِم>کَلات، بَلۆچِستاں رْیاسَتی یُونیَن، چارشَمبِہ 21 جُلائی 1954