تَہاری ءَ گَم ءِ لَشکَر، چِراگ تَہنا اِنت
چَہ رُژن ءِ آسجَہا دَر، چِراگ تَہنا اِنت
شَپ ءِ گُبارێں اَنیچَک سَتَر تَہاردێم اِنت
مَن ءَ چِراگ ءِ وَڈ ءَ بَر، چِراگ تَہنا اِنت
اَبێتک اَبێتک گُش ئے بے تَو کُلّێں جاہ ءُ دَمَگ
پَدا کَدی کن ئے واتَرّ، چِراگ تَہنا اِنت
اِے شَہر ءَ کۆر سَرۆک اَنت ءُ کۆر رَہدَربَر
گِلَگ کن ئے نَوَر ئے شَرّ، چِراگ تَہنا اِنت
تَلَب کَسّ ءَ نہ وَپا ءِ، نہ واہَگ ءِ گَنج ءِ
اِد ءَ مُگێم چَڈ ءُ زَرّ، چِراگ تَہنا اِنت
بُرَو بُرَو کہ پہ تَو کَلکَشان ءُ ماہ زَریت
مَجَلّ مَجَلّ مَنی دِلبَر، چِراگ تَہنا اِنت
شَپ ءَ جِتائی ءِ آس ءَ پہ رُژن ءِ چَکّاس اِنت
کَدی بَلیت اِے دِل ءِ چَر، چِراگ تَہنا اِنت
مَن رۆچ ءِ سَرجَمێں بالاد کازی سۆتک بلے
چَہ بام ءِ سَر گِرَگ ءَ سَر، چِراگ تَہنا اِنت
<سترُنگ><اِم>مُبارِک کازی