شَپ بۆجیگے سازَگ بیت
واب چِراگے ھالَگ بیت
گْوات ءَ جُستے دَست ءَ اِنت
دَریا چۆن بادێنَگ بیت
تَئی مَلگۆر ءِ کَیپ ءِ مُج ءَ
بے گاہ چَمّے سْرُومَگ بیت
آپ کَوار ءَ نِشت نَکَنت
آس دِل ءَ پَہرێزَگ بیت
اَنچۆکہ تَو راست گُش ئے
دْرۆگ اوں اَنچۆ بَندَگ بیت
گْوات ءَ مَکتَب مَٹّ کُتَگ
آس ءَ رَسم، رَبێدَگ بیت
گۆں ما زِندَگ بُو زان ئے
لَہتے زَہر ھَوادَگ بیت
سێنَگ ھَلکے آبادێں
مِہر مَبیت تَ کێنَگ بیت
لَبزاں ھَرکَس سِتر کُتَگ
گُنگێں اَہد وَ چێدَگ بیت
زێبائی تَئی رَنج مَبیت
دِل وَ پَدا رێپێنَگ بیت
اِینچ چِراگانی نْیام ءَ
تَہنا شَپ دِلوارَگ بیت
<سترُنگ><اِم>مُنیر مۆمِن