کۆہ ءُ گْیاباں، دَمک ءُ دَریا رۆشنا
تَو چِراگے ئے، تَئی دُنیا رۆشنا
سَمبَہ اَنت بَندێں دَریگانی نَسیب
چَمّ سَلامَت ھَر تَماشا رۆشنا
بْیا زِمِستاں پۆشَگ ءَ اِنت مێتَگ ءَ
بْیا مَن ءَ را آس پێڈا رۆشنا
مُرتَگێں مَردانی اَرماناں کُت اَنت
رُتکَگێں کَبرانی ڈیوا رۆشنا
یَل نَداتَگ مَن تَئی نام ءِ گِرَگ
گْوات ءَ کُرتَگ ھَر چِڈِکّا رۆشنا
سُہب بۆسیت شِنگێں مَلگۆراں تَئی
شَپ چِدا رَپتَگ، نوں پاد آ رۆشنا
پێسَر ءَ مَن پہ تَو بالِت دِل وَتی
بُوتَگ اَنت اِستال رَند ءَ رۆشنا
تَو کہ جُنز ءِ، جُنز اَنت ماہ ءُ رۆچ ھَم
تَئی مُساپِر، کَوش ءِ ھَر تا رۆشنا
دْرَپش ءِ تَو وابانی ھَنکێن ءَ وَتی
مَن وَتی کَولانی دێم ءَ رۆشنا
ھَرکُجا چاراں مُنیر گِنداں وَت ءَ
مِہر تَئی آدێنک ءِ پَیم ءَ رۆشنا
<سترُنگ><اِم>مُنیر مۆمِن
(یَکّ بِچیلے آزماں)