پہ ھۆشاماں تْرَہیت، بَشّامێں زِرد ءِ گَمجَتێں بۆلاں
کَپ اَنت بیر ءُ سْرَپ اَنت دُمبال، ءُ سَبزیت سُورمَگێں بۆلاں
سَگار ءِ ھۆنچَکێں زِہ بیت کہ لالێں رَکّ، مانا یَکّ
بِبیت کاڈ ءِ کہ ڈێہ ءِ گَم، گُشاں ما سَرجَمێں بۆلاں
زِمینجُمب ءِ ھُدابُند اِنت، چۆ سالی ٹَپّیا نالیت
بَنیادَم گُش ئے، زۆراکیانی، بے وَسێں بۆلاں
کَپ اَنت واہَگ دِل ءِ پَٹّا چۆ تُنّاپێں ڈَگار ءَ تْرَمپ
مَنی ھُشکاوَگێں زِرد اِنت، مَنی ھُشکاوَگێں بۆلاں
رَگام اَہت اَنت، شُت اَنت اَہدی، نَیَہت اَنت نَوبَت ءُ باری
وَداری کَد، دِل ءِ رَہسَر، کَدی دِلمانَگێں بۆلاں
وَپا یَکّ، مِہر یَکّ، اَرمانیێں دِل یَکّ، مِنزِل یَکّ
پہ تَو بَمبُور بات آباد ءُ پہ مَن مَہرَمێں بۆلاں
<سترُنگ><اِم>اَتا شاد