تُنّیگێں کِشکے ئے، نہ شِپادێں چِراگے ئے
گۆں دیدَگاں نَتران ئے، چِہ پَیمێں چِراگے ئے
سۆہاں کَنت سِلاہاں پہ تَو گْوات ھَر شَپ ءَ
تَہنائیں مێتَگے ءِ گَنۆکێں چِراگے ئے
چۆکہ گِرۆک شَہم ءِ ءُ چۆ زێمِر ءَ بُج ئے
بَندیگێں شانتُلے ئے کہ بالێں چِراگے ئے
ھَر مَییَتێں دَریگ ءَ تَئی بْرَمش سْرَپتَگ اَنت
گْواتانی ھَمزُبان ئے، مَلَنگێں چِراگے ئے
دیدَگزِبَہرێں مۆسُم ءَ سَنج بُوتَگ ءِ
اِنجیرێں شاہَڈانی شُدیکێں چِراگے ئے
تَئی ساہِگ ءَ مَدرَپش اَنت مَنی دَرد چۆن کَن اَنت
پُرمِہرێں دیدَگے ئے، تَبیبێں چِراگے ئے
نوں گِلَّہانی دَنز رُدان اَنت تَئی ساہِگ ءَ
دۆدانی کْوَہنێں ھَلک ءَ نَوائیں چِراگے ئے
ھَر پاس بالاں مَن تَرا اَرواہ ءِ مانِش ءَ
مئے گْوَستَگێں شَپانی تَو وابێں چِراگے ئے
ھۆشامے بَر کَنان اِنت مُنیر دیدَگاں مَنی
رُژنائیں نُور ئے تَو تَنَکّێں چِراگے ئے
<سترُنگ><اِم>مُنیر مۆمِن
(<اِم>یَکّ بِچیلے آزماں)