مارا زێبائی ئے بَنگانی مَلاراں گِپتَگ
جاگَہے ساز سَواساں گۆں مئے ماں اَڈ اَنت
جاگَہے رَنگ مئے دامُن ءِ لَمب ءَ دار اَنت
چَمّ کِشکانی دَمانے اگں پہ ما بِکَپ اَنت
کاینت تَئی مَہپَر ءِ پێچانی تَہا چێر بَ اَنت
مارا زێبائی ئے بَنگانی مَلاراں گِپتَگ
لَبز شَپ کَپتَگێں اِے ھَلک ءِ مَوالانی وَڈ ءَ
اَچ وَت ءَ دُور رَو اَنت ءُ وَت ءَ شۆہاز کَن اَنت
جێڈَگاں پْرُشتَگێں دَرپے وَتی ھَنکێں کُتَگ
دُور اوشتاتَگێں گۆیاک نِدارَہ چاریت
مارا زێبائی ئے بَنگانی مَلاراں گِپتَگ
کَد زَمانَگ تَئی دۆچانی وَڈ ءَ زێبا بیت
بے گَہ ءِ نۆد تَئی زُلپانی سَلام ءَ بْیا اَنت
گْوات ھَرّۆچ بِسِندیت وَتی کَوشی تایے
پہ تَئی بُو ءُ بُساں جان ءُ گُباراں بُمُشیت
مارا دێوَنَگێں چاگِرد ءِ ھَزانَگ گۆن اِنت
وَہد ءَ دَست بَستَگ ءُ سَر جَہل کُتَگ اوشتاتَگ
مَرچی چَہ دُورا گِدارے ما وَت ءَ مَیم کُتَگ
مارا زێبائی ئے بَنگانی مَلاراں گِپتَگ
دَریا گێگاں کَنان اِنت تَئی کْرام ءُ داباں
مَنی دُنیا مَنی اَرسانی وَڈ ءَ رُشنا اِنت
نۆد ساچانێں تَئی ھَمبُو ءُ مِسکێں اَہد اَنت
کانگَڈَوانی وَڈ ءَ آشِکی زَیپێں دْوا اَنت
رَہسَر ءُ دَمکاں گُش ئے بال داتَگ اَنت زَہگاں
پاد آزمان ءِ سَر ءَ اَنت ءُ زِمین ءَ چارێں
مارا زێبائی ئے بَنگانی مَلاراں گِپتَگ
<سترُنگ><اِم>مُنیر مۆمِن