زَیمێں باریگے ءِ اوست پاسپان اَت اَنت
آگَہێں دَردے اَت، وابێں اَرمان اَت اَنت
گْوات بَندیگ اَت اَنت ماں اِے ھَلک ءُ دَراں
مُرگ ھَرجاہ کہ سَر گِپت اَنت زِندان اَت اَنت
نَوبَت ءِ دِل پہ رُژنائیں چَمّے زَرِت
ماہ ءُ اِستال بَندێں دَریگان اَت اَنت
چۆ شَپ ءَ شِنگ ءُ تَلان اَت تَہنائیے
دۆستانی چِڈِکَّہ مِچاچان اَت اَنت
جَنگ مَہرَنگے ءِ مِہلَبێں دْراہی اَت
چۆ گُل ءِ مَہپَراں زَہم ساچان اَت اَنت
پْرُشتَگَت وَہد ءِ آدێنک گْیاباںے ءَ
چَمّاں سُورَت دِلاں نْیاد اومان اَت اَنت
اێمِنی واب ءُ راستی ءِ ھَمراہی ءَ
ما سَپَر کُت پہ مَہگۆنَگ ءِ دْراہی ءَ
دُور داشتَگ چَہ ھَرَّنگێں نادراہی ءَ
سُورمَگێں ھاک تَئی مُہکَمێں گْواہی ءَ
زیکّێں مَرک ءَ چَہ مَرچیگێں بے گْواہی ءَ
<سترُنگ><اِم>مُنیر مۆمِن