ھَور بُگواریت، نۆد بِشَنز اَنت
سَبز بِبَنت تَئی ھُشکێں دار
چۆ کہ سَمین ءَ ، واہَگ ءِ دْرین ءَ
بۆد کَن اَنت تَئی ڈَنّ ءُ ڈَگار
سَبز بِبَنت تَئی ھُشکێں دار
گیر آراں سَبزتاکێں کَہیراں
اَہدی اَہداں کۆر ءُ زَہیر آں
سَبزێں تَلّ ءَ ، ھارێں مَلّ ءَ
یات کَنت ھَر سُہب ءُ ساہار
سَبز بِبَنت تَئی ھُشکێں دار
بۆرسَواراں، شێرشِکاراں
نۆدشَلان ءُ آشَّہاراں
تَنگَہێں بَچّاں، مَکَّہێں ماتاں
مِنزِل مِنزِل راہ سَپار
سَبز بِبَنت تَئی ھُشکێں دار
بُرز ءَ کۆہ تَئی مِہر ءِ پانَگ
زێرِ زِمین ءَ دُرّ ءِ دانَگ
گَوہَر شَنز اَنت، جَوہَر دْرَنز اَنت
نیلّێں زِر ءُ مِسکَیپێں کِشار
سَبز بِبَنت تَئی ھُشکێں دار
بیت سَر ءَ ساہِگ ماہِکانی
نْیاد دِل ءَ کاینت کاڈانی
کۆکِر بَند اَنت، پُلّ بِچکَند اَنت
کئێت ھَیالاں مَوج ءُ مَلار
سَبز بِبَنت تَئی ھُشکێں دار
<سترُنگ><اِم>اَتا شاد