مئے مِہرانی گَنجێں دَیاراں اِشک دِگِہ چیزے
بِلّ اِے دْرۆگێں کَول ءُ کَراراں، اِشک دِگِہ چیزے
نَئکِہ وَپا ءِ گَوہَر گۆن اَنت نَنکہ چِراگے اَرسانی
پہ تَو دِگِہ یَکّ چیزے کاراں، اِشک دِگِہ چیزے
مِہر ءِ کیسَگ ھۆرک کُتَگ مَن، دَرد ءِ دامُن ھالیگ اِنت
مُپتا نِشتَگ راہ ءَ چاراں، اِشک دِگِہ چیزے
پیرێں دِلانی پیرێں مِہر ءِ مُزّ دِگِہ رَنگ اَنت
وَرنائی ءِ اُمر ءِ بَہاراں، اِشک دِگِہ چیزے
تَو اوں بِزان ئے، مَن اوں بِماراں، مۆسُم رَنگ ءَ مَٹّ بِکَنت
تَو اوں بِگِند ئے، مَن اوں بِچاراں، اِشک دِگِہ چیزے
<سترُنگ><اِم>مُنیر مۆمِن