مَن چۆ کَپُتا
نَلاں پہ دۆست ءَ
شَیدا آں چۆ اومَر ءَ
شَپ سْیَہتَہار اِنت
رَہ پَہکا گار اِنت
جَمبَر شَلان اِنت سَر ءَ
بے وَس آں چۆ مَن
نادَر آں چۆ مَن
چُنچۆن رَساں پہ تَرا
جِندُن اَزاب اِنت
سینَگ کَباب اِنت
اَنگَت شِگانُن سَر ءَ
واہَگ ءِ راہ ءَ
گار کَناں ساہ ءَ
اێرجیگ کن ئے چُنت بَر ءَ
نِشتَگ ءُ نَلاں
پُرّیگێں سالاں
پہ ھانُل ءِ ھاتِر ءَ
دَرداں دَوا نێست
دۆستاں وَپا نێست
اَرز ءَ بَراں کَئی گْوَر ءَ
مَن چۆ کَپُتا
نَلاں پہ دۆست ءَ
شَیدا آں چۆ اومَر ءَ
<سترُنگ><اِم>سَیَد ھاشُمی
کَراچی، جُون-1953