ساجِد مَن ءَ پَہِل کَن!
مَنی دانسَرێں زِند ھُشکێں پَہِلیے۔ مَن اَنچۆ پہ تَو بَژنیگ آں کہ اَنّی چۆ پہ کَچکۆل ءَ (کہ اِے وَہد آئی ءِ گۆں وَتی ھَمسَرُواں وانَگ ءُ وَژنۆدی ئے وَہد اِنت، بلے مَن سَرجَمێں کَہۆل ءِ بۆجا بَڈّ ءَ داتَگ)۔ بلے دو ھَمینچُک بَژنیگ ءُ کُہتیگ آں کہ وَہدے تَو گۆں وَتی دیرشانێں دیدانک ءُ بُودناکی ءَ پہ بَلۆچی ءِ سْیاہَگ ءَ تۆمے چَنڈَگ ءَ اَت ءِ، تَرا دیرێں دَیارے ءَ پَنچِکے رَسِتَگَت۔
اوہِ ھَسا بات گۆں وَتی چات ءِ پُگُلیا!
اَرماں کہ مَن بِزانتێں بلے شْوانَگ ءَ کُج ءَ کن ئے؟ پُلّ! بَسّ، گۆں وَتی چێر ئے چادِر ءَ بَندۆکێں بَندَوے۔ ھَہَہَہَہَ!
ساجِد! مَن زاناں کہ تَو وَتی بَلۆچی ءَ اَلَّم پێش دار ئے ءُ گُش ئے:
“بِلّ ھَسا وَتی کُچرایا۔ اِینچُک کہ شْوانَگ رۆچ، ماہ، سال، گْوات ءُ مۆسُماں زانت، دِگِہ کَسّ نَزانت۔” ءُ دِگِہ بارێں چے چے گُش ئے پہ شْوانَگ ءِ دانائی ءَ ۔
ساجِد! مَردُم ماں مَگیشات، ھَردێں کہ ماں گیشِت، گُڈا آ ھَسا بیت۔
دێم ءِ مَردُم ساجِد اِنت۔ ھَسا نِشتَگ کہ مَنی ویزا ءُ سێٹ ءُ بِگِر ءُ بِدار۔
تَو دیوال ءَ تِکَہ اَت ءِ، سێٹ ھَلیر ءِ سَیکُنجی کُوٹی ئے کِبلَہی دَریگ ءِ بُن ءَ نِشتَگِت ئے۔ تَو نَرم نَرما گۆں وَتی گْرانێں تَوار ءَ گُشت: “ھاجی ءُ سَمیرا گَپّ بِجَن گۆں، تَرا ٹَہێن اَنت۔”
مَنی ھَیال ءَ تَو چَہ اَپریکَہ ءَ اَتکَگَت ئے۔ پَدا مَن سَہی بیتاں کہ سێٹ ھَلیر ءِ دُکّاں دُزّاں جَتَگ ءُ تَئی پاسپۆٹ ءُ سَپَری کاگَدِش ھَم بُرتَگ اَنت یا دِگِہ جَہے گار اَنت، بلے اَنچێں جێڈَہے ھَست اَت۔ تَو پہ ھَمِشاں تَکانسَر اَت ءِ ءُ پہ اێشانی دَر گێجَگ ءَ تَچ ءُ تاگ کَنَگ ءَ اَت ءِ۔ پَدا چَہ سێٹ ءِ نێکێں رَہمَتاں مَن تَرا نَدیست۔
باز وَہد ءَ رَند گۆں تَو وَڈزَپا دُچار کَپتاں کہ تَو چَہ مَنی وَڈێں نابُودے ءَ پہ بَلۆچِستاں ٹاِمزا نِبشتانکے لۆٹِت شَہید گُلام مَہمَد ءِ بابَت ءَ ۔ مَن تَرا باز گُشت کہ واجَہ ءِ شان ءَ مَنِ ھَسا چے نِبِشتَہ کُت کَناں، بلے تَو اَت ءِ کہ ھَسا ءِ نام ھَم وَتی مَزَنشانێں تاک ءَ پَشت گِتک۔
مَنی دِل ءَ آ رۆچی مَن تَرا گُشت کہ اَوَلی بَر ءَ مَن ءُ تَو کُج ءَ ڈیکّ وارتَگ۔ کَراچی ءَ یَکّ لۆگے ءَ کہ ماڈیے ءِ سَیمی یا چارُمی تَبَکّ ءَ اَت۔ لۆگ ءِ سئے کۆٹی اَت اَنت ءُ یَکّ ھالے اَت۔ مَن ءَ یاد نَکَنت کہ کئے مَنی ھَمرَہ اَت۔ یَکّ تَنکُکێں سَیکُنجی ھالُکے۔ سَیێں کۆٹیانی دَپ ھَمے ھالُک ئے سَیێں کُنجان اَنت ءُ چارِک ءَ چُلّ اِنت۔ ءُ ھَمِد ءَ گَرم ءِ وَہد ءَ گۆں یَکّے ءِ آیَگ ءَ آدِگے سَیێں چارێں ناماں یَکّے گێش بُوت، آ ساجِد اَت۔
مَن وَتی دیتَگێں واب ءِ کِسَّہ ھَم کُت اَنت۔ تَو سَکّ کَندِت ءُ گُشت:
“ھَسا! نِزۆرێں مَردُمانی واب ءُ ھَیال ھَردُک سَکّ نِزۆر بَنت۔ تَو بایَد اِنت اِے واب مَدیستێں۔ دِگِرا نَزاناں پہ وَت وَ ھِچّ وَڈ ءَ پَرچا کہ وَتکُشی سَکّێں بُزدِلێں کارے۔ تَو ءُ وَتکُشی؟! مَردُمے کہ مُلک ءَ نِشت مَکَنت، آ وَتکُشی ھَم کُت نَکَنت۔”
بلے ساجِد! مَن بے وَتکُشی ءَ سَکرات ءَ آں، بے ساد ءِ گُٹّ ءَ کَنَگ ءَ مَوتانی آں۔ زی مَن تَرا ءُ سْیاہُو ءَ را وَنتَگَت، مَرچی وَت ھما آسیاب ءَ کَپتَگاں۔ آپرین بات شُمئے اوپار ءَ ۔
ساجِد! مَن ھَم وَتی چُکّانی وَدار ءَ نِشتَگاں۔ مَنی کار اَنگَت نَبیتَگ اَنت۔ بَسّ پہ چَرس رۆچاں تێلانک دَیَگ ءَ آں۔ راست گُشی، سْیاہُو اَتکَگَت آسِپ ئے سیر ءَ ۔ پہ تَو مَن ءَ سَکّ زَہیر بُوت۔ گێشتِر شُمئے کِسَّہ گیر اَتک اَنت۔ مَن تَئی جُست کُت، گُشت ئِے:
“سَکّێں بے تَہمبُلے۔ دێمے کہ رَوت، پَدا آیَگ نَزانت، بلے مارا سَبر اِنت۔ رۆچے اَلَّم دَست ءَ کَپیت، دْرُستێں بے ران ئِے گِرێں!!”
نَزاں تَرا بیبی مِہلَب یا تاج بَلۆچ ءَ ھال دَتَگ یا ناں کہ بَلۆچانی نۆک جَتَگێں “مَنڈی”آ کہ نام ءَ کِتابانی اِنت، بازێںے ءَ کَراچی ءِ دَمکانی رێڈی والَوانی وَڈ ءَ وَتی گُٹّ ءِ تَل بُرتَگ۔ بلے پَکِستان ئے اِے دْرۆگێں کِتابدۆستی ءَ ءُ جَہان ءِ رێپێنَگ ءَ کہ بَلۆچ نَدکار یا وَتی سَرکاری چُلۆپَکار کار گِپتَگ اَنت، تاں اِد ءَ اِے پَیداگیرانی مَنڈیا کِتابے کہ شُتَگ، آ تَوِ ساجِد ئے کِتاب “مُلک مُلکے ناں دَرمُلک” بیتَگ۔ تَو بَلۆچانی دُمی کَریم دَشتی ئے، گۆں وَتی کَمنِبِشتَہی ءُ اَبَدمانی ءَ ۔
ساجِد! تَو کہ بَلۆچی زُبان ءِ سْیاہَگ ءِ سَر ءَ کار ءَ اَت ءِ، مَن تَئی ھِلاپا پَیزبُکّا پۆسٹے دات۔ سێٹ ءَ مانا جُست کُت: “ھَسا ھَیر اِنت؟”
مَن کہ وَتی شَشێں کْیاس ڈَلِت اَنت، گُڈا سێٹ سَرپَد بُوت کہ اِے گۆں وَت اِنت۔ اِے وَہد ءَ بازێںے اِے بابَت ءَ چِست ءُ اێر کَنَگ ءَ اَت۔ سِٹا پَمِشکا مَن ءَ ھال کُت کہ بَلکێں ھَسا ھَمایانی رِد ءَ اِنت۔
پَہِل کَن بَلۆچ!
مَن ءَ اِے پَہِلی، ھما وَہد ءَ لۆٹَگی اَت کہ تَئی سَر ءَ لُمَّہ جان ءِ نِبِشتانک شِنگ بیتَگَت۔ گۆں آئی ءِ وانَگ ءَ مَن چَہ وَت پَشَل بیتان ءُ دِل ءَ اَتک کہ چَہ مادَر ءَ پَہِلی بِلۆٹاں بلے چَہ وَتی پَشَلی ءَ ھِچّ گُشت نَکُت۔
آ نِبِشتانک ءِ تَہا مَنی وَڈێں بازێں نابُودے ڈۆبارَگ بیتَگَت ءُ مَن وَت ءَ ھَمایانی تَہا شُمار کَناں، کہ لُمَّہ جان ءَ پہ تَئی کارانی دێم ءَ بے سَرێں گَپّ وَدی کَنَگ ءُ وَسَّرێں باوَست کَنُک گُشتَگِت اَنت۔
مَن وَسَّرا پہ اَرَبی سْیاہَگ ءِ سَیَد رَہبَند ءَ تَرا ڈۆبارَگ ءَ اَتاں کہ وَت ئِے ھَم نَزانَگ ءَ اَتان ءُ رۆچہ مَرچی ھَم نَزانان ئِے، بلے ھَسا اَت وَسَّرا وَت دو مَچّ ءُ دو کَہیر اَت۔ آ وَہد ءَ سَنگَتاں “جُہدکارانی پَتّار”ئے نام ءَ وَڈزَپی دیوانے ھَست اَت۔ مَن نازاکێں کارینا جَہانی ئے گالِوار ءَ بَلۆچی ءَ گَپّ کُت ءُ پَیزبُکّا پۆسٹے دات کہ ساجِد اِیسایانی گَور ءَ بَہا بیتَگ، پہ چَندے کَلدار ءَ بَلۆچی ءَ زَوال کَنگ ءَ اِنت، سْیاہَگ ءَ گَنتِر ماں گیشێنَگ ءَ اِنت، بِگِر بِدار…۔
سُہبا واب ءَ پاد اَتکاں داں ھَسا چَہ وَڈزَپ ئے دیوان ءَ کَشَّگ بیتَگ ءُ گَل ءَ ھَم ماٹُو کُتَگ۔ مُردِنی اِنت مَن ءَ کییا ءِ سَر ءَ سَکّ بَد اَتک۔ مَن ھَمے پَہمِت کہ اِے دْرُست کییا ءِ کار اَنت۔
ساجِد! اِے تَو اَت ءِ پُلّ! کہ یَکّے بُنجُل ءُ دُمی نْیادی ءِ بِستار ءَ پہ یَکّ زُباںے ءِ دێمرَوی دَیَگ ءَ شَرّ پَہمَگ ءَ اَت ءِ۔ پَمِشکا دو کار یَجّاہ کَنَگ ءَ اَت ءِ، یَکّے اُپسالا ءُ دُمی بی این ایم۔ ھَردُکاں پہ بَلۆچی زُبان ءِ سْیاہَگ ءِ گِہتِری ءَ کار گِرَگ ءَ اَت ءِ، تَوجیلے سازَگ ءَ اَت ءِ۔ چێرمَین داکتَر نَسیم جاں، کییا بَلۆچ، اَلی جاں دادا، ھَمراہ3 تاج بَلۆچ ءَ ۔ دُمی نێمَگ ءَ تَئی ھِلاپا کازی داد مَمَد رَیہان ءَ گۆں سَیَد رَہبَند ءِ گَہێڈێں مَنّۆگِراں پَیزبُکّ بَڈ ءَ اَت ءُ زْیا بَلۆچ مَرچیگێں وَڈ ءَ تۆکُو اَت ءُ گۆں وَتی پَٹ ءُ پۆلی گُشاد ءَ یَکّ ءُ یَکّ اِلمی نِبشتانکے ھَم دَور دَیَگ ءَ اَت۔ اَنچۆ کہ اَنّی پہ رۆمَن ءَ گَپّ جَنت، دَپ ءُ دِل اِنت۔
ساجِد! مَن سَدَّک آں، تَو اَگاں اِشتاپ مَکُتێں، مَرچی پہ رۆمَن ءَ اِدارَہے بیتَگَت۔ تَو اَلَّم تَوجیلے سازَگ ءَ اَت ءِ، کار ءَ اَت ءِ، گۆں گَلاسی ءُ چَرسی ءَ جاک ءَ اَت ءِ، کِسَّہ سازَگ ءَ اَت ءِ، پہ بَلۆچ، بَلۆچی ءُ بَلۆچِستان ءَ کار ءَ اَت ءِ، ءُ مئے وَڈێں شْوانَگ…۔ اَڈ ءِ بِبَکش، چاتی پُگُل تَرا ڈۆبارَگ ءَ اَت اَنت۔
گُڈسَرا تَرا جُستے کَناں۔ پُلّ، اگں تَرا اِے کار دَیَگ بیتێں کہ اَنّی اُپسالاءَ تَئی سَنگَتانا داتَگ، تَو چِتَور کُتَگَت؟ تَو ھَم وَتی اِے زَنڈێں گُٹّ بارَگ کُت کُتَگَت؟؟؟
ھاوَند ءِ مَیار ئے۔ جاہ تَئی وَشّ بات
تَئی گُنَہگار،
<سترُنگ><اِم>ھَسا بِجّار
19-2-2025
چَہ پَنَہگیرانی بُنجُلے ءَ