اَلی پَرواز دیوان ءِ جارچێن اِنت۔ ھاسێں مِہماں داکتَر ھَنیپ شَریپ اِنت ءُ پاگواجَہ واہِد شۆہاز۔ جاگَہ وادی ھَوز اِنت۔
دیوان ءَ اَہمَد اَبدال ءَ مئے پِٹّۆک ءِ شاِر جَمیل دیدار ءِ کِتاب پہ بَہا ءَ گۆن اَنت۔
تاج بَلۆچ ءَ گۆلڈلیپ سِگرێٹ ءَ سُوٹّ پہ سُوٹّ کُتَگَت۔ مَن گُشت تاج، گاسلێٹ ءَ دَور دَئے گۆں۔ آ ھَیراں بُوت۔ مَن پَدا گُشت کہ لَیٹَرا مَنی نێمَگ ءَ شانک دَئے گۆں کہ وَتی سِگرێٹ ءَ رۆک کَناں۔ آ کَندَگ ءَ لَگِّت کہ گاسلێٹ۔
مَنزُور بِسمِل، نَزیر ناسِر ئے اَنچۆ کَش ءَ نِشتَگَت کہ مَردُم ءَ گُشت آئی ءِ نُماسَگ اِنت۔
ھالِد تَگرانی، مُنیر تَگرانی، اَلی جاں داد، ھَمید دَردیگ، بِسمِل، اَلی پَرواز ءُ مَہمَد دیدَگ ءَ شَیر وَنت۔ نَزیر ناسِرا چاربَندے وَنت ءُ وَتی دو ناوَل ئے سَر ءَ گَپّ جَت۔
ھاسِل نُور ءَ سَوگِند وارتَگَت کہ شَیر نَواناں۔ سَنگَتاں باز مِنَّت کُت۔ آئی ءَ زانا پَیسَلَہ کُتَگَت کہ شَیر نَچَلیت۔
پَشت کَپت ھاسێں مِہماں داکتَر ھَنیپ شَریپ۔ آئی ءَ دو رَند ءَ وَتی راستێں دَست وَتی میدانی تَہا بُرت ءُ آُرت۔ بَلکێں پَلسَپی گَپّ اِت اَنت۔ ما سَرپَد نَبیتێں کہ داکتَر ءَ چے گُشت۔ واہِد شۆہاز ءِ شَیر ءِ وانَگ ءَ رَند دیواں کُٹِّت۔
بَٹّ آرَگ بیت اَنت۔ مَن یَپَّیما ھَنیپ ئے نێمَگ ءَ چارَگ ءَ اِتاں کہ گَپّ پَلسَپی جَنت، بَلکێں بَٹّاں اوں پَلسَپیانی ڈَولا وارت۔ چاراں اِنّاں، آ مئے مُلکی مَردُمانی رَنگ ءَ بَٹّ وَرَگ ءَ اِنت۔
اَہمَد اَبدال ءَ گُشت بلے یَکّ رْیالے کَمّ اِنت۔ اَناگَہا نَزیر ناسِرا گُشت مَن وَتی رْیال تَرا داتَگ۔ مَن گُشت اَبدال! اِے ناسِر اِنت۔ اِے تَرا ھَمِد ءَ کَلّ کَنت، تَو سَہی اوں نَبَئے۔ سَنگَت شُرُو بیت اَنت کَندَگ ءَ۔ اَہمَد اَبدال ءَ پَدا گۆں نَزیر ناسِرا گُشت تَئی کیسَّگ ءَ زاناں کَدی رْیال دَر اَتکَگ کہ اَنّی دَر کئێت۔
ما گاڈی ءَ سَوار بُوت ءُ رَوَگ ءَ لَگِّتێں۔ گاڈی ءِ تَہا سَنگَتاں گُشت: سَتّار! ھَنیپ شَریپ ءَ چے گُشت؟ مَن گُشت شُما اوں۔۔۔۔
<سترُنگ><اِم>سَتّار سَنی