ھَردێں کہ بَلۆچِستان ءَ واتَرّ رَوَگ ءِ بابَت ءَ جێڈاں گُڈا دِل ءِ تَہا یَکّ اَجَبێں دَردے چِست بیت۔ اِے دَرد ءَ مَن لَبزانی پۆشاک گْوَر ءَ دات نَکَناں۔ اَسَل ءَ مَن وَہدے پَلَستین ءِ دَرپَدَرێں مَردُماں آہانی زِمین ءَ واتَرّ رَوَگ ءَ دیست گُڈا مَن جێڈِت کہ اِشانی زِمین کہ پێسَر ءَ چۆ نَبیتَگ، نی کہ اِے واتَرّ رَو اَنت گُڈا اود ءَ ھِچّ پَشت نَکَپتَگ۔ اِے ھِچّ نَگِند اَنت، دْرُستانی لۆگ ءُ مێتَگ پْرُشتَگ اَنت۔ زِمین ءِ جاوَر مَٹّ بیتَگ اَنت۔ ھَمۆدَ مَنی دِل ءَ جُستے پاد اَتک کہ اِے مَردُم اود ءَ رَو اَنت چے کَن اَنت؟
گُڈا آہانی سَواس مَن وَتی پاداں کُت اَنت بِزاں کہ وَت ءَ را آہانی جاگَہ ءَ کُت ءُ گُماں کُت کہ مَن بَلۆچِستان ءَ رَوَگ ءَ آں۔ یَکّ اَنچێں سَرزِمینے کہ چَہ اَبرَمی زێبایاں سَرچَکار اِنت بلے جَنگ ءِ آماچ اِنت، جَنگ ءَ آ زِمین تَباہ کُتَگ۔
بَلۆچِستاں پہ مَن مُدام یَڈَّولا بیتَگ۔ بلے پَدا ھَم زِمین ءِ گیراں دِل مُدام سُچیت۔ اِے گیر لۆگے ءِ یا یَکّ مێتَگے ءِ نَہ اَنت۔ مَنی مِہر، اِے گیر ءُ تْرانَگ گۆں بَلۆچِستان ءِ ھَمُک سِنگ ءُ ڈۆک ءَ بَندۆک اَنت کہ نی دُژمِن ءِ پَلیتێں دَستاں سُتکَگ اَنت۔ بلے زِمین وَ زِمین اِنت، چۆ کہ بَلۆچی ءَ گُش اَنت “وائے وَتَن، ھُشکێں دار”۔
ھَردێں کہ بَلۆچِستان ءِ بابَت ءَ جێڈاں، ھَر سَہت ءَ مَنی اَرواہ مِریت۔ وَہدے ھَور ءِ وَشبُو مَنی تَنگَہێں زِمین ءُ ھاک ءَ رَجیت، گُڈا گُش ئے مَن دُبَر زِندَگ باں۔ مَنی زِمین ءِ ھَمُک سِنگ کہ رۆچ ءِ بالاد ءَ سۆتکَگ اَنت، مئے بُندَپتَر ئے شاہِد اَنت۔ ھَمُک ڈۆک مئے گَہگیری ئے کِسَّہ ءَ کاریت۔
مَن ءَ ھما وَہد یات کاینت کہ مَن وَتی زِمین ءِ کَوراں گۆں وَتی دَستاں پہ چَنک آپ وارتَگ۔ آ آپ ءِ تَہا مَن مُدَم وَتواجَہی ءُ آزاتی ءِ شیرکِنێں تام چَشتَگ۔ بَلۆچِستان ءِ دْرَچک گۆں وَتی سَبز ءُ بَزێں شاہاں تَہنا ساہِگ نَدَ اَنت، اِے مئے وَستا آرامجاہ اَنت، مئے اوتاگ اَنت۔
گۆں زِمین ءِ ھاک ءَ یَکّ پُرمِہرێں سْیادیے ھَست اِنت۔ مئے ھاک ءِ ھَمُک دَنز گَہگیری ءُ زِمیندۆستی ئے سَوتاں اَلہاں کَنت۔ اود ءِ ھُشکێں گْوات مئے سِستَگێں پیر ءُ کَماشانی ھَلوَتاں نَپَر کَنت۔ گُلزِمین ءِ گْوات کہ دْرَچکانی تاکاں سُرێنیت گُڈا یَکّ سازے گُشاں اێر رِچیت۔ آ ساز ءِ تَہا گْوَنڈُوانی ٹَہک ءُ کَندَگ ھَوار اَنت کہ یَکّ وَہدے آ گْوَنڈُوانی لَیبجاہ بیتَگ اَنت۔ ھَمے زِمین کہ دُبَر زِندَگ بَیَگ ءِ واہَگ ءَ داریت، مئے گَہگیر ءِ چێدَگ اِنت۔
بَلۆچِستان ءِ آزماں کہ چَہ شَہر ءِ رُژنایانی گُبار ءَ پَہک اِنت، اود ءِ اِستال اَنچۆ تْرِپ اَنت ءُ نَزّیک کاینت گُش ئے اگں دَست ءَ بِشَہار ئے گُڈا دَست ءِ دِل ءَ ھَنکێں کَن اَنت۔ اود ءِ سُہب گۆں وَت رَنگانی اَمبار کار اَنت ءُ آزمان ءِ پێشانیگ ءَ چۆ ھِنّی ءَ رَج اَنت۔ اِے زێبائی ئے سازَگ یَکّ اِزمکارے ءِ گُمان ءَ ھَم ڈَنّ اِنت۔
دَرمُلکی ءَ بَلۆچِستان ءِ یات ھَزانَگ جۆڈ بَنت۔ ھَمُک یات مئے پَجّار ءِ ٹُکُّراں نَزّاریت۔ اِے واہِشت کہ ما وَتی ڈێہ ءَ بِگِندێں، وَتی ھاک ءَ دَست بِجَنێں، وَتی زِمین ءَ اَمباز بِکَنێں، بے اُپّارێں تاگَتے ءِ رَنگ ءَ اِنت کہ مارا زِمین ءَ دُبَر واتَرّ کَنَگ ءُ پہ باندات ءَ جُہد کَنَگ ءَ مَجبُور کَنت۔
بِلّ ئِے کہ مئے زِمین بَدَل بیتَگ، تَباہ بیتَگ بلے زِمین ءَ گۆں مِہر مُجَّتی اِنت۔ کۆہانی ڈَولا تَمَرد، زِر ءِ ڈَولا جُہل ءُ آزمان ئِے ڈَولا پْراہ ءُ شاہِگان اِنت۔ اِے نَکشَہ ءِ تَہا جۆڈ بیتَگێں یَکّ جاہ ءِ واتَرّی نَہ اِنت بَلکێں ھما جاہ ءِ واتَرّ ءِ گَپّ اِنت کہ اود ءَ مئے گَمجَتێں دِلانی ھَنکێں سَبزیت، کہ اود ءَ مئے اَرواہ آزات بَنت۔ اود ءِ ھَمُک شَئے بِلّ ئِے یَکّ ھُشکێں دارے بِبیت بلے مئے دِل ءَ آ چۆ مِہروانێں ماتے ءِ کُٹّ ءَ اِنت۔
<سترُنگ><اِم>جَمال بَلۆچ